മനാമ: ബഹ്‌റൈനില്‍ സ്വദേശിവല്‍ക്കരണം നടപ്പിലാക്കാനുള്ള നീക്കം അധികൃതര്‍ ശക്തമാക്കുന്നു. ഇതിന്റെ ഭാഗമായി സ്വദേശിവല്‍ക്കരണ പദ്ധതിയായ 'സമാന്തര ബഹ്‌റൈന്‍വല്‍ക്കരണ'ത്തിന്റെ രണ്ടാംഘട്ടം ഈ വര്‍ഷം മെയ് മുതല്‍ ആരംഭിക്കുമെന്നാണ് സൂചന.

ഇതനുസരിച്ച് 2017 മെയ് 1 മുതല്‍ വര്‍ക്ക് പെര്‍മിറ്റ് പുതുക്കുന്ന വിദേശികള്‍ക്കെല്ലാം സ്വദേശി വത്കരണവുമായി ബന്ധപ്പെട്ട പുതിയ നിബന്ധനകള്‍ ബാധകമാകുമെന്ന് ലേബര്‍ മാര്‍ക്കറ്റ് റെഗുലേറ്ററി അതോറിറ്റി (എല്‍.എം.ആര്‍.എ) ചീഫ് എക്‌സിക്യൂട്ടീവ് ഉസാമ ബിന്‍ അല്‍ അബ്‌സി വ്യക്തമാക്കിയിട്ടുണ്ട്.

തൊഴില്‍ മേഖലകളില്‍ കൂടുതല്‍ സ്വദേശികളെ ഉള്‍പ്പെടുത്തുമെന്നതടക്കമുള്ള ചില ഉറപ്പുകള്‍ അദ്ദേഹം മന്ത്രിസഭാ യോഗത്തിലും നല്‍കിയിരുന്നു. സ്വദേശികളെ ജോലിക്കെടുക്കാത്ത എല്ലാ കമ്പനികള്‍ക്കും ഇതിനകം ഇമെയില്‍ അയച്ചിട്ടുണ്ടെന്നും അദ്ദേഹം വ്യക്തമാക്കി.

കൂടാതെ സ്വദേശിവല്‍ക്കരണ തോതറിയാന്‍ രാജ്യത്തെ കമ്പനികളില്‍ പരിശോധന നടത്തും. സ്വദേശികളെ ഉള്‍പ്പെടുത്താത്ത കമ്പനികള്‍ക്കെതിരെ നടപടികള്‍ സ്വീകരിക്കും. ഓരോ കമ്പനികള്‍ക്കും ടാര്‍ജറ്റ് നല്‍കിയതിലും താഴെയാണ് സ്വദേശിവല്‍ക്കരണമെങ്കില്‍ വര്‍ക്ക്‌പെര്‍മിറ്റ് പുതുക്കുമ്പോള്‍ ടാര്‍ജറ്റിനനുസൃതമായി രണ്ടു വര്‍ഷത്തേക്ക് 300 ബഹ്‌റൈന്‍ ദിനാര്‍(ഏകദേശം 50,000രൂപക്കു മുകളില്‍) നല്‍കേണ്ടിവരും. സ്വദേശിവല്‍ക്കരണത്തിന് എത്ര പേരുടെ കുറവുണ്ടെങ്കില്‍ അത്രയും പേരുടെ പേരില്‍ പണം നല്‍കേണ്ടിവരുമെന്നും അദ്ദേഹം അറിയിച്ചു.

സ്വദേശികള്‍ അവരുടെ കഴിവുകള്‍ വിവിധ മേഖലകളില്‍ തെളിയിച്ചിട്ടുണ്ട്. രാജ്യത്തെ 60 ശതമാനം കമ്പനികളുടെ സ്വദേശിവല്‍ക്കരണത്തിനുള്ള പ്രതിബദ്ധതയെ അദ്ദേഹം പ്രശംസിച്ചു. ചില കമ്പനികള്‍ സ്വദേശികളുടെ കഴിവുകളുടെ അടിസ്ഥാനത്തില്‍ ഇവരുടെ എണ്ണത്തില്‍ വര്‍ധന വരുത്തി. ഇതു കമ്പനികളുടെ ഉത്തരവാദിത്ത ബോധത്തെ സൂചിപ്പിക്കുന്നതായും അദ്ദേഹം പറഞ്ഞു.

അതേസമയം പുതിയ തീരുമാനങ്ങള്‍ ഏറെ ആശങ്കയോടെയാണ് പ്രവാസിമലയാളികളടക്കമുള്ള വിദേശികള്‍ നോക്കിക്കാണുന്നത്. ഇതര ജി.സി.സി രാഷ്ട്രങ്ങളുടെ ചുവട് പിടിച്ചാണ് ബഹ്‌റൈനിലും വിവിധ പരിഷ്‌കരണങ്ങള്‍ വരാറുള്ളത് എന്നതിനാല്‍ സ്വദേശി വത്കരണത്തിന് സഊദിയെ മാതൃകയാക്കി ആദ്യഘട്ട സ്വദേശി വത്കരണം മൊബൈല്‍ വിപണന മേഖലയിലാകുമോ എന്ന ആശങ്കയും പ്രവാസികള്‍ക്കിടയിലുണ്ട്. മലയാളികളടക്കമുള്ള നിരവധി വിദേശികളാണ് ഇവിടെ സ്വന്തമായും അല്ലാതെയും മൊബൈല്‍ വിപണന മേഖലയിലും സര്‍വീസ് രംഗത്തും പ്രവര്‍ത്തിച്ചു വരുന്നത്.