കൊച്ചി: കാഴ്ച്ച പരിമിതിയുള്ളവരുടെ രണ്ടാമതു ലോകകപ്പ് ടി20യില്‍ വിജയികളായ ഇന്ത്യന്‍ ടീമിലെ മലയാളി താരം മുഹമ്മദ് ഫര്‍ഹാനെയും അസിസ്റ്റന്റ് കോച്ച് സാജു കുമാറിനേയും അനുമോദിച്ചു. ക്രിക്കറ്റ് അസോസിയേഷന്‍ ഫോര്‍ ദി ബ്ലൈന്‍ഡ് ഇന്‍ കേരള, കേരള ക്രിക്കറ്റ് അസോസിയേഷന്‍ എന്നിവയുടെ സംയുക്താഭിമുഖ്യത്തിലാണു ചടങ്ങ് സംഘടിപ്പിച്ചത്.
കലൂര്‍ ജവഹര്‍ലാല്‍ നെഹ്‌റു അന്താരാഷ്ട്ര സ്റ്റേഡിയത്തിലെ ജി.വി രാജ ഹാളില്‍ നടന്ന ചടങ്ങ് പി.ടി തോമസ് എം. എല്‍.എ ഉദ്ഘാടനം ചെയ്തു. കേരള ക്രിക്കറ്റ് അസോസിയേഷന്‍ പ്രതിനിധികളായ അനന്തനാരായണന്‍, എഡ്‌വിന്‍ സേവ്യര്‍, കള്‍ച്ചറല്‍ സെന്റര്‍ ഓഫ് ദോഹ ആന്‍ഡ് ഖത്തറിന്റെ മുന്‍ പ്രസിഡന്റ് ഗിരീഷ് കുമാര്‍, എംഫാര്‍ ഗ്രൂപ്പ് പ്രതിനിധി റാസുല്‍ റഹ്മാന്‍, സി.എ.ബി.കെ പ്രസിഡന്റ് അനില്‍ കുമാര്‍, സെക്രട്ടറി രജനീഷ് ഹെന്‍ട്രി സംസാരിച്ചു.
മുഹമ്മദ് ഫര്‍ഹാനുംസാജു കുമാറിനുമുള്ള ഉപഹാരങ്ങളും ചടങ്ങില്‍ പി ടി തോമസ് എം എല്‍ എ സമ്മാനിച്ചു. കെ.സി.എയുടെ ഉപഹാരങ്ങള്‍ അനന്തനാരായണനും, എഡ്‌വിന്‍ ജോസഫും കൈമാറി. വിവിധ ബ്ലൈന്‍ഡ് ക്രിക്കറ്റ് ക്ലബുകള്‍ക്കുള്ള ക്രിക്കറ്റ് കിറ്റുകളും വിതരണം ചെയ്തു.