തിരുവനന്തപുരം: കേരള സര്‍ക്കാര്‍ സാംസ്‌കാരിക വകുപ്പും, പുരാവസ്തു പുരാരേഖാ വകുപ്പും, തെലങ്കാന സര്‍ക്കാരിന്റെ സാംസ്‌കാരിക വകുപ്പും സംയുക്തമായി ഹൈദരാബാദില്‍ നടത്തുന്ന കേരള-തെലങ്കാന സാംസ്‌കാരിക പൈതൃകോത്സവത്തിന് നിറവാര്‍ന്ന തുടക്കമായി. സാംസ്‌കാരിക മന്ത്രി എ.കെ. ബാലന്‍ ഉദ്ഘാടനം നിര്‍വഹിച്ചു. സാംസ്‌കാരിക വകുപ്പിന്റെ നേതൃത്വത്തില്‍ ഇന്ത്യയുടെ വിവിധ സംസ്ഥാനങ്ങളിലും ഇത്തരം പൈതൃകോത്സവങ്ങള്‍ സംഘടിപ്പിക്കുമെന്ന് ഉദ്ഘാടന പ്രസംഗത്തില്‍ മന്ത്രി അറിയിച്ചു. തെലങ്കാന സാംസ്‌കാരിക ടൂറിസം മന്ത്രി അസ്മീറ ചന്ദുലാല്‍ മുഖ്യാതിഥിയായ ചടങ്ങില്‍ തുറമുഖ പുരാരേഖാ വകുപ്പ് മന്ത്രി രാമചന്ദ്രന്‍ കടന്നപ്പള്ളി അധ്യക്ഷനായി.സാംസ്‌കാരിക വകുപ്പ് സെക്രട്ടറി റാണി ജോര്‍ജ്, തെലങ്കാന ടൂറിസം ആന്‍ഡ് കള്‍ച്ചര്‍ സെക്രട്ടറി ബി.വെങ്കിടേശം, പുരാരേഖ, പുരാവസ്തു വകുപ്പ് ഡയറക്ടര്‍ ജെ.രജികൂമാര്‍, ഭാഷാ ഇന്‍സ്റ്റിറ്റ്യൂട്ട് ഡയറക്ടര്‍ പ്രൊഫ. വി. കാര്‍ത്തികേയന്‍ നായര്‍, ലളിതകലാ അക്കാദമി സെക്രട്ടറി പൊന്ന്യന്‍ ചന്ദ്രന്‍, ഭാരത് ഭവന്‍ മെമ്പര്‍ സെക്രട്ടറി പ്രമോദ് പയ്യന്നൂര്‍, മലയാളം മിഷന്‍ സെക്രട്ടറി സുജ സൂസന്‍ ജോര്‍ജ്, ഏഴാച്ചേരി രാമചന്ദ്രന്‍ തുടങ്ങിയവര്‍ ഉദ്ഘാടന സമ്മേളനത്തില്‍ പങ്കെടുത്തു. പൈതൃകോത്സവത്തോട് അനുബന്ധിച്ച് പുരാരേഖ, പുരാവസ്തു വകുപ്പിന്റെ അപൂര്‍വ ചരിത്രരേഖകളുടെയും, ചരിത്രവസ്തുക്കളുടെയും പ്രദര്‍ശനം, കേരള ബുക്ക് മാര്‍ക്ക് സൊസൈറ്റിയുടെ പുസ്തക പ്രദര്‍ശനം, ലളിതകലാ അക്കാദമിയുടെ സഞ്ചരിക്കുന്ന ചിത്രശാല, ചലച്ചിത്ര അക്കാദമിയുടെ ചലച്ചിത്രപ്രദര്‍ശനം എന്നിവയുടെ ഉദ്ഘാടനം മന്ത്രിമാരായ ഏ.കെ. ബാലന്‍, രാമചന്ദ്രന്‍ കടന്നപ്പള്ളി എന്നിവര്‍ ചേര്‍ന്ന് നിര്‍വഹിച്ചു. കേരള പൈതൃകത്തിന്റെ നാള്‍വഴികള്‍ ഓര്‍മ്മപ്പെടുത്തുന്ന സംഗീതനൃത്താവിഷ്‌ക്കാര മായ-മലയാളക്കാഴ്ച, നാട്ടരങ്ങ്, വാദ്യകലാസമന്വയം, തെലങ്കാന ഫെസ്റ്റ് എന്നിവ വിവിധ വേദികളില്‍ തനിമയാര്‍ന്ന ശൈലികളില്‍ അരങ്ങേറി. ഭാരത്ഭവന്‍, ഫോക്ക്‌ലോര്‍ അക്കാദമി, ലളിതകലാ അക്കാദമി, ചലച്ചിത്ര അക്കാദമി, മലയാളമിഷന്‍, കേരളബുക്ക്മാര്‍ക്ക് സൊസൈറ്റി, മ്യൂസിയം, മൃഗശാല തുടങ്ങിയ സാംസ്‌കാരിക സ്ഥാപനങ്ങളുടെ സഹകരണത്തോടെയാണ് പൈതൃകോത്സവം ഹൈദരാബാദില്‍ സംഘടിപ്പിക്കുന്നത്.