പെരിന്തല്‍മണ്ണ: കേന്ദ്ര സര്‍ക്കാറിന്റെ സ്വയം തൊഴില്‍ പദ്ധതിയായ പി.എം.ഇ.ജി.പി ക്കു കീഴില്‍ വ്യവസായ സംരംഭം ആരംഭിക്കുന്നതിന് ഗ്രാമ, നഗര മേഖലയിലുള്ള സംരംഭകരില്‍ നിന്നും ജില്ലാ വ്യവസായ കേന്ദ്രം അപേക്ഷ ക്ഷണിച്ചു.
ഉല്‍പന്നങ്ങളുടെ നിര്‍മാണവുമായി ബന്ധപ്പെട്ട സംരംഭങ്ങള്‍ക്ക് 25 ലക്ഷം രൂപയും സേവനം പ്രദാനം ചെയ്യുന്ന സംരംഭങ്ങള്‍ക്ക് പത്തുലക്ഷം രൂപയും മൂലധന ചെലവ് വരുന്ന പ്രൊജക്ടുകള്‍ക്ക് അപേക്ഷ സമര്‍പ്പിക്കാവുന്നതാണ്. അപേക്ഷകന് 18 വയസ് പൂര്‍ത്തിയാകണം. ഓണ്‍ലൈന്‍ ആയി മാത്രമേ അപേക്ഷ സ്വീകരിക്കൂ. അപേക്ഷയോടൊപ്പം വിദ്യാഭ്യാസ യോഗ്യത, സാങ്കേതിക പരിജ്ഞാനം, ജാതി തെളിയിക്കുന്ന സര്‍ട്ടിഫിക്കറ്റ്, ആധാര്‍ കാര്‍ഡ്, പ്രൊജക്ട് റിപ്പോര്‍ട്ട്, ഫോട്ടോ, മറ്റു രേഖകള്‍ എന്നിവ അപ്പ്‌ലോഡ് ചെയ്യണം. കൂടുതല്‍ വിവരങ്ങള്‍ക്ക്  ജില്ലാ വ്യവസായ കേന്ദ്രം, താലൂക്ക് വ്യവസായ ഓഫീസുകള്‍ എന്നിവയുമായോ ബ്ലോക്ക്, മുനിസിപ്പല്‍ വികസന ഓഫീസര്‍മാരുമായോ ബന്ധപ്പെടാവുന്നതാണ്.