അമ്പലപ്പുഴ: മത്സ്യവുമായി പോയ ഇന്‍സുലേറ്റ് ലോറി മരത്തിലിടിച്ച് മറിഞ്ഞു. ലോറിയുണ്ടായിരുന്നവര്‍ അത്ഭുതകരമായി രക്ഷപെട്ടു.
ദേശീയപാതയില്‍ വണ്ടാനം വിമന്‍സ് ഹോസ്റ്റലിന് മുന്‍വശത്ത് ഇന്നലെ പുലര്‍ച്ചെ ഒരു മണിയോടെയായിരുന്നു അപകടം.
ചേര്‍ത്തല തൈക്കല്‍ കടപ്പുറത്തു നിന്നും മത്സ്യവുമായി കായകുളം പട്ടാണി മാര്‍ക്കറ്റിലേക്ക് പോകുകയായിരുന്നു മിനിലോറി.
കൃത്യസമത്ത് മാര്‍ക്കറ്റില്‍ എത്തുന്നതിനായി അമിതവേഗതയില്‍ ഓടിച്ചുപോയ ലോറി ദേശീയപാതയോരത്ത് നിന്ന രണ്ട് മരങ്ങളിലായി ഇടിക്കുകയും ഇടിയുടെ ആഘാതത്തില്‍ പിന്നിലേക്ക് പോയ ലോറിയുടെ മൂടി കെട്ടിയ ഭാഗം മറ്റുരണ്ട് മരങ്ങളില്‍ ഇടിച്ച് തകരുകയും ലോറിക്കുള്ളില്‍ ഉണ്ടായിരുന്ന മത്സ്യം പ്രദേശമാകെ തെറിച്ചുവീഴുകയുമായിരുന്നു. ഈസമയം മറ്റ് വാഹനങ്ങളോ കാല്‍നട യാത്രക്കാരോ ഇല്ലാതിരുന്നതിനാല്‍ വന്‍ ദുരന്തം ഒഴിവായി. ലോറിക്കുള്ളില്‍ ഡ്രൈവറോടൊപ്പം ഉണ്ടായിരുന്ന വ്യാപാരിയും ക്ലീനറും പരിക്കുകളില്ലാതെ രക്ഷപെട്ടു. പുന്നപ്ര എസ്.ഐ അജയമോഹന്റെ നേതൃത്വത്തില്‍ മേല്‍ നടപടി സ്വീകരിച്ചു.