തിരുവനന്തപുരം: രാജ്യാന്തരവിമാനത്താവള നടത്തിപ്പ് സ്വകാര്യ മേഖലയ്ക്ക് കൈമാറാന്‍ കേന്ദ്ര സര്‍ക്കാര്‍ തീരുമാനിച്ചതിന്റെ ഭാഗമായി
നിലവിലെ അടിസ്ഥാന സൗകര്യങ്ങള്‍ നേരിട്ട് കാണാനും വിമാനത്താവള അധികൃതരുമായി ചര്‍ച്ചനടത്താനുമെത്തിയ സ്വകാര്യ കമ്പനിയുടെ പ്രതിനിധികളെ വിമാനത്താവളത്തിലെ ജീവനക്കാര്‍ തടഞ്ഞു പ്രതിഷേധിച്ചു. ഡയരക്ടറുടെ ഓഫിസിന് മുന്നില്‍ ജീവനക്കാര്‍ നടത്തിയ പ്രതിഷേധം കനത്തതോടെ സ്വകാര്യ കമ്പനി പ്രതിനിധികള്‍ ചര്‍ച്ച പൂര്‍ത്തിയാക്കാതെ മടങ്ങി. ഇന്നലെ രാവിലെ 11 മണിയോടെ എത്തിയ രാജ്യാന്തര സ്വകാര്യ കമ്പനിയായ ജി.എം.ആറിന്റെ പ്രതിനിധികളാണ് ജീവനക്കാരുടെ പ്രതിഷേധത്തെ തുടര്‍ന്ന് ഡയരക്ടറുമായുള്ള ചര്‍ച്ച പാതിവഴിയില്‍ നിറുത്തി മടങ്ങിയത്. വിമാനത്താവളം സ്വകാര്യവല്‍ക്കരിക്കുന്നതിന്റെ ഭാഗമായി എയര്‍പോര്‍ട്ട് അതോറിറ്റി 17ന് നടത്തുന്ന പ്രീ ബിഡ് മീറ്റിങ്ങിനു മുന്നോടിയായാണ് ജി.എം.ആര്‍ കമ്പനി പ്രതിനിധികള്‍ വിമാനത്താവളത്തിലെത്തിയത്.
സ്വകാര്യവല്‍ക്കരണത്തെ എതിര്‍ക്കുന്ന തിരുവനന്തപുരം എയര്‍പോര്‍ട്ട് പ്രൊട്ടക്ഷന്‍ ഫോറത്തിന്റെ നേതൃത്വത്തിലാണ് ഒരുവിഭാഗം ജീവനക്കാരുടെ പ്രതിഷേധം അരങ്ങേറിയത്. കറുത്ത കൊടികളുമായി എത്തിയ എയര്‍പോര്‍ട്ട് അതോറിറ്റി എംപ്ലോയീസ് യൂനിയന്‍ പ്രവര്‍ത്തകര്‍ ഡയരക്ടറുടെ മുറിക്ക് മുന്നില്‍ കൂടി നിന്ന് സ്വകാര്യ കമ്പനി അധികൃതര്‍ മടങ്ങിപ്പോകണമെന്നാവശ്യപ്പെട്ട് മുദ്രാവാക്യം മുഴക്കുകയായിരുന്നു. സ്വകാര്യ കമ്പനികളെ വിമാനത്താവളത്തിലേയ്ക്ക് പ്രവേശിപ്പിക്കില്ലെന്നും പ്രതിഷേധക്കാര്‍ മുന്നറിയപ്പും നല്‍കി. പ്രതിഷേധം ശക്തമായതോടെ പൊലിസ് സ്ഥലത്തെത്തിയെങ്കിലും പ്രതിഷേധം തുടര്‍ന്നതോടെ ജി.എം.ആര്‍ പ്രതിനിധികള്‍ മടങ്ങിപ്പോവുകയായിരുന്നു.