ന്യൂഡല്‍ഹി: കൊറോണ വൈറസ് പടര്‍ന്നുപിടിക്കുന്ന ചൈനീസ് നഗരങ്ങളില്‍ കുടുങ്ങിയ ഇന്ത്യക്കാരെ നാട്ടിലെത്തിക്കാനുള്ള ആദ്യ എയര്‍ ഇന്ത്യ വിമാനം ഇന്ന് വൈകീട്ട് പുറപ്പെടും. വൈറസിന്റെ പ്രഭവകേന്ദ്രമായ വുഹാനിലും പരിസര പ്രദേശങ്ങളിലും കുടുങ്ങിയവരെയാണ് ആദ്യം നാട്ടിലെത്തിക്കുക, തുടര്‍ന്ന് ഹൂബൈ പ്രവിശ്യയുടെ മറ്റ് ഭാഗങ്ങളില്‍ കുടുങ്ങിയവരെയും ഒഴിപ്പിക്കും.

വുഹാനില്‍ കുടുങ്ങിയവരെ ഇന്ന് വൈകീട്ടോടെ ഒഴിപ്പിക്കാനുള്ള തയാറെടുപ്പുകള്‍ തുടങ്ങിയതായും അവിടെ കുടുങ്ങിക്കിടക്കുന്നവര്‍ക്ക് ഇതു സംബന്ധിച്ച് അറിയിപ്പ് നല്‍കിയതായും ഇന്ത്യന്‍ എംബസി വ്യക്തമാക്കി.

ഇവരെ എത്തിച്ച ശേഷം 14 ദിവസത്തെ നിരീക്ഷണത്തിനു ശേഷം മാത്രമേ പുറത്തുവിടുകയുള്ളൂവെന്ന് സര്‍ക്കാര്‍ അറിയിച്ചിട്ടുണ്ട്.