അരീക്കോട്: വീട്ടില്‍ ചെടി നനയ്ക്കാന്‍ പി.ടി.എ പ്രസിഡന്റ് സര്‍ക്കാര്‍ സ്‌കൂളിന്റെ കുടിവെള്ള കിണറ്റില്‍നിന്നു വെള്ളമെടുക്കുന്നതായി ആരോപണം. അരീക്കോട് പെരുമ്പറമ്പ് ഗവ. ഹയര്‍സെക്കന്‍ഡറി സ്‌കൂളിലെ വൈദ്യുതി കണക്ഷന്‍ ഉപയോഗിച്ചാണ് സ്‌കൂളിനായി ചീക്കുളം പാടത്ത് നിര്‍മിച്ച കിണറ്റില്‍നിന്നു വെള്ളമെടുക്കുന്നതായി നാട്ടുകാര്‍ ആരോപിക്കുന്നത്.
സ്‌കൂള്‍ പരിസരത്തു താമസിക്കുന്ന കെ.എസ്.ഇ.ബി ജീവനക്കാരനും സ്‌കൂളിന്റെ പി.ടി.എ പ്രസിഡന്റുമായ വ്യക്തിയുടെ വീട്ടിലെ ചെടികളാണ് സ്‌കൂളിലെ കിണറ്റില്‍നിന്നു വെള്ളമെടുത്ത് നനയ്ക്കുന്നത്. നാലു മാസമായി സ്‌കൂള്‍ കിണറ്റില്‍നിന്ന് ഇദ്ദേഹം വീട്ടിലേക്കു വെള്ളം പമ്പ് ചെയ്യുന്നതായി നാട്ടുകാര്‍ പറയുന്നു. ഇതിന്റെ ദൃശ്യങ്ങള്‍ സോഷ്യല്‍മീഡിയയില്‍ പ്രചരിച്ചതോടെ കഴിഞ്ഞ ദിവസം രാത്രി കണക്ഷന്‍ നീക്കം ചെയ്തിട്ടുണ്ട്. വിഷയത്തില്‍ നടപടിയെടുക്കണമെന്നാവശ്യപ്പെട്ട് ജില്ലാ വിദ്യഭ്യാസ ഓഫിസര്‍ക്കും എ.ഇ.ഒയ്ക്കും പ്രദേശവാസികള്‍ ഇന്നു പരാതി നല്‍കും.