യൂറോ കപ്പിന്റെ ഗ്രൂപ്പ് ഡി മത്സരത്തില്‍ ഇന്ന് സൂപ്പര്‍ ടീമുകളുടെ പോരാട്ടം. ആദ്യ മത്സരത്തില്‍ നിലവിലെ ചാംപ്യന്‍മാരായ സ്‌പെയിന്‍ ചെക്ക് റിപ്പബ്ലിക്കിനെ നേരിടും. വേഗതയും പരചയ സമ്പത്തും ഒരുമിക്കുന്ന മത്സരത്തില്‍ ശക്തമായ മത്സരം പ്രതീക്ഷിക്കാം. യൂറോപ്യന്‍ ഫുട്‌ബോള്‍ ചരിത്രത്തില്‍ കാര്യമായ പേരും പെരുമയുമുള്ള രണ്ട് ടീമുകള്‍ കളത്തിലിറങ്ങുമ്പോള്‍ കാണികള്‍ക്ക് ഇന്ന് ഒരു സൂപ്പര്‍ പോരാട്ടം തന്നെ പ്രതീക്ഷിക്കാം.

രണ്ടാം മത്സരത്തില്‍ ശക്തരായ സ്വീഡന് അയര്‍ലന്‍ഡാണ് എതിരാളികള്‍. മാനസിക മൂന്‍തൂക്കം സ്വീഡനാണെങ്കിലും യോഗ്യതാ മത്സരങ്ങളിലെ മികച്ച വിജയങ്ങള്‍ അയര്‍ലന്‍ഡിന്റെ ആത്മവിശ്വാസം വര്‍ധിപ്പിക്കുന്നുണ്ട്. പി.എസ്.ജി യുടെ തുറുപ്പു ചീട്ടും ലോകോത്തര താരവുമായ സ്ലാട്ടന്‍ ഇബ്രാഹിമോവിച്ചിന്റെ സാന്നിധ്യമാണ് സ്വീഡിഷ് ടീമിന്റെ കരുത്ത്. പ്രതിരോധംകൊണ്ട് പേരുകേട്ട അയര്‍ലന്‍ഡിന്റെ കോട്ട തകര്‍ക്കാന്‍ സ്വീഡന്റെ മുന്നേറ്റ നിരക്കാവുമോ എന്നത് കാത്തിരുന്ന് കാണാം.

മൂന്നാം മത്സരത്തില്‍ പ്രതിരോധ ഫുട്‌ബോള്‍ കൊണ്ട് പേരുകേട്ട ഇറ്റലിയും ബെല്‍ജിയവും തമ്മില്‍ ഏറ്റുമുട്ടും. യോഗ്യതക്കായി കളിച്ച പത്തു മത്സരങ്ങളില്‍ ഏഴിലും വിജയിക്കാനായതിന്റെ ആത്മവിശ്വാസത്തിലാണ് ടീം. കൂടുതല്‍ ഗോള്‍ നേടുന്ന പ്രവണത ടീമിനില്ലെങ്കിലും നേടിയ ഗോളില്‍ തൊണ്ണൂറു മിനിറ്റും പ്രതിരോധിച്ചു നില്‍ക്കുന്ന അസാധ്യ കഴിവ് ഇറ്റലിയെ വേറിട്ടു നിര്‍ത്തുന്നു. എന്നാല്‍ ഫിഫ റാങ്കിങ്ങില്‍ രണ്ടാം സ്ഥനത്ത് നില്‍കുന്ന ബെല്‍ജിയത്തെ ചെറുതായല്ല ഇറ്റലി കാണുന്നത്. ചുവന്ന ചെകുത്താന്‍ എന്നറിയപ്പെടുന്ന ബെല്‍ജിയം 71-ാം സ്ഥാനത്തു നിന്നും ഒന്നാം സ്ഥാനം വരെയെത്തിയത് ടീമിന്റെ ഒത്തിണക്കവും മികച്ച പോരാട്ടവും കൊണ്ടാണ്. വേഗവും പ്രതിരോധവും തമ്മിലുള്ള പോരാട്ടമാവുമ്പോള്‍ മത്സരം തീ പാറും.