ന്യൂഡല്‍ഹി: നിര്‍ഭയാ കേസ് പ്രതികളുടെ വധശിക്ഷ നടപ്പാക്കുന്നത് ഇനിയൊരു വിധിയുണ്ടാകുന്നതുവരെ നീട്ടിവച്ചതിനെതിരേ കേന്ദ്രസര്‍ക്കാര്‍ സമര്‍പ്പിച്ച ഹരജിയില്‍ ഡല്‍ഹി ഹൈക്കോടതി പിന്നീട് വിധിപറയും. പ്രതികള്‍ക്കുള്ള മരണവാറന്‍ഡ് റദ്ദാക്കിയ ഡല്‍ഹി പാട്യാലാ ഹൗസ് കോടതി വിധിക്കെതിരേയായിരുന്നു കേന്ദ്രം ഹൈക്കോടതിയെ സമീപിച്ചിരുന്നത്. കേസില്‍ ഇന്നലെ അടിയന്തരമായി വാദംകേട്ട ഹൈക്കോടതി, ഹരജി വിധി പറയാനായി മാറ്റിവയ്ക്കുകയായിരുന്നു.

ഇന്നലെ വൈകിട്ട് മൂന്നു മണിക്കൂറോളമാണ് ഹൈക്കോടതിയില്‍ ഇതുസംബന്ധിച്ച് വാദം നടന്നത്. പ്രതികള്‍ ശിക്ഷ നീട്ടിക്കൊണ്ടുപോകാന്‍ ശ്രമിക്കുകയാണെന്നും നിയമവ്യവസ്ഥയെ പരിഹസിക്കുകയാണെന്നും കേന്ദ്രസര്‍ക്കാരിനുവേണ്ടി ഹാജരായ സോളിസിറ്റര്‍ ജനറല്‍ തുഷാര്‍ മേത്ത വ്യക്തമാക്കി.

ശിക്ഷ ഉടന്‍തന്നെ നടപ്പാക്കണമെന്നും നിയമംവച്ച് കളിക്കാന്‍ അനുവദിക്കരുതെന്നും അതു ജനങ്ങള്‍ക്കു നിയമസംവിധാനത്തിലുള്ള വിശ്വാസം തകര്‍ക്കുമെന്നും അദ്ദേഹം പറഞ്ഞു. തെലങ്കാനയില്‍ ബലാത്സംഗക്കേസ് പ്രതികളെ പൊലിസ് വെടിവച്ചുകൊന്നതു ജനങ്ങള്‍ ആഘോഷിച്ചതും അദ്ദേഹം ചൂണ്ടിക്കാട്ടി. എന്നാല്‍, ഈ കേസില്‍ മാത്രമെന്തിനാണ് ഇത്ര തിടുക്കമെന്നായിരുന്നു പ്രതിഭാഗം അഭിഭാഷകരുടെ ചോദ്യം. പ്രതികള്‍ അവര്‍ക്കു നിയമപ്രകാരമുള്ള അവകാശം വിനിയോഗിക്കുകയാണെന്നും അവര്‍ അവകാശപ്പെട്ടു. വിഷയത്തില്‍ വാദംകേട്ട ഹൈക്കോടതി വിധി പറയുന്നത് നീട്ടുകയായിരുന്നു.

കേസില്‍ മുകേഷ് സിങ്, വിനയ് ശര്‍മ എന്നിവരുടെ ദയാഹരജി രാഷ്ട്രപതി തള്ളിയിരുന്നു. ദയാഹരജി തള്ളിയതിനെതിരേ മുകേഷ് സിങ് സമര്‍പ്പിച്ച ഹരജി സുപ്രിംകോടതിയും തള്ളി.

പ്രതികളുടെ തിരുത്തല്‍ ഹരജികളും നേരത്തെ സുപ്രിംകോടതി തള്ളിയിരുന്നു. എന്നാല്‍, കഴിഞ്ഞ ദിവസം മറ്റൊരു പ്രതി അക്ഷയ് സിങ്ങും രാഷ്ട്രപതിക്കു ദയാഹരജി നല്‍കിയിട്ടുണ്ട്. ഇതില്‍ തീരുമാനം വന്നിട്ടുമാത്രമേ ഇനി മരണവാറന്‍ഡ് പുറപ്പെടുവിക്കാനാകൂ. പവന്‍ ഗുപ്ത എന്ന പ്രതിക്കും ഇനി നിയമാവകാശങ്ങള്‍ നിലനില്‍ക്കുന്നുണ്ട്.

മൂന്നു പ്രതികളെ തൂക്കിലേറ്റുന്നതിനു തടസമില്ലെന്ന വാദം കഴിഞ്ഞ ദിവസം കോടതി തള്ളിയിരുന്നു. നാലു പ്രതികളെയും ഒന്നിച്ചു തൂക്കിലേറ്റണമെന്നാണ് കോടതി പറഞ്ഞിരിക്കുന്നത്. ഇത് ഉപയോഗപ്പെടുത്തിയാണ് ഓരോരുത്തരായി ഹരജികള്‍ സമര്‍പ്പിച്ച് ശിക്ഷ നീട്ടിക്കൊണ്ടുപോകുന്നത്.