ലണ്ടണ്ടന്‍: ഇംഗ്ലീഷ് പ്രീമിയര്‍ ലീഗില്‍ ലിവര്‍പൂള്‍ കുതിപ്പ് തുടരുന്നു. ബ്രൈടണെ എതിരില്ലാത്ത ഒരു ഗോളിന് വീഴ്ത്തിയാണ് ലിവര്‍പൂള്‍ വീണ്ടും കുതിപ്പ് നടത്തിയത്.സിറ്റിക്കെതിരേയുള്ള മത്സരത്തില്‍ ലിവര്‍പൂള്‍ പരാജയപ്പെട്ടതോടെ ഇരു ടീമുകളും തമ്മിലുള്ള പോയിന്റ് വ്യത്യാസം നാലായി കുറഞ്ഞിരുന്നു.
ലിവര്‍പൂളിന്റെ ഗോളടിയന്ത്രവും ഈജിപ്ഷ്യന്‍ താരവുമായ മുഹമ്മദ് സലാഹാണ് വിജയ ഗോള്‍ നേടിയത്. 50 ാം മിനുട്ടില്‍ പെനാല്‍ട്ടി കിക്കിലൂടെയായിരുന്നു സലാഹിന്റെ വിജയഗോള്‍. 22 മത്സരങ്ങളില്‍ നിന്ന് 57 പോയിന്റുമായി ലിവര്‍പൂള്‍ കിരീടത്തിലേക്ക് കുതിക്കുകയാണ്. മറ്റൊരു മത്സരത്തില്‍ 2-1 ന് ചെല്‍സി ന്യൂ കാസിലിനെ പരാജയപ്പെടുത്തി.
പെഡ്രോ (9), വില്ല്യന്‍ (57) എന്നിവരാണ് ചെല്‍സിക്കായി വല കുലുക്കിയത്. 40 ാം മിനുട്ടില്‍ ക്ലാര്‍ക്കിന്റെ വകയായിരുന്നു ന്യൂകാസിലിന്റെ ആശ്വാസ ഗോള്‍. 2-1 ന് സതാംപ്ടണ്‍ ലെസ്റ്റര്‍ സിറ്റിയെ പരാജയപ്പെടുത്തി. 45 ാം മിനുട്ടില്‍ സതാംപ്ടണ്‍ താരം യാന്‍ വലാറെ ചുവപ്പ് കാര്‍ഡ് കണ്ട് പുറത്തായിട്ടും ലെസ്റ്ററിന് അവസരം മുതലാക്കാനായില്ല. 11 ാം മിനുട്ടില്‍ ജെയിംസ് വാര്‍ഡിയുടെ പെനാല്‍ട്ടിയിലൂടെയായിരുന്നു സതാംപ്ടണിന്റെ ആദ്യ ഗോള്‍. ആദ്യ പകുതിയുടെ അധിക സമയത്ത് ഷെയ്ന്‍ ലോങ് രണ്ടാം ഗോളും നേടി. 58 ാം മിനുട്ടില്‍ വില്‍ഫ്രഡാണ് ലെസ്റ്ററിന്റെ ആശ്വാസ ഗോള്‍ നേടിയത്.
ഗ്രിസ്മാന്റെ ഗോളില്‍ അത്‌ലറ്റിക്കോ
ലാലിഗയിലെ തുടര്‍ച്ചയായ അഞ്ചാം മത്സരത്തിലും ഗോള്‍ കണ്ടെത്തി അത്‌ലറ്റിക്കോ മാഡ്രിഡിന്റെ ഫ്രഞ്ച് താരം അന്റോയിന്‍ ഗ്രിസ്മാന്‍. ലെവന്റെയേയാണ് അത്‌ലറ്റിക്കോ പരാജയപ്പെടുത്തിയത്. 57 ാം മിനുട്ടില്‍ പെനാല്‍ട്ടിയില്‍ നിന്നായിരുന്നു ഗ്രിസ്മാന്റെ ഗോള്‍ പിറന്നത്. ജയത്തോടെ 38 പോയിന്റുമായി അത്‌ലറ്റിക്കോ രണ്ടാം സ്ഥാനത്താണ്. ബാഴ്‌സലോണ ഒന്നാം സ്ഥാനത്ത് തന്നെ തുടരുന്നു. സീസണിലെ അവസാന 16 മത്സരത്തിലും അപരാജിത മുന്നേറ്റം നടത്തുന്ന അത്‌ലറ്റിക്കോ കിരീടം ലക്ഷ്യമാക്കിയുള്ള കുതിപ്പിലാണ്.