കാസര്‍കോട്: നാലു പഞ്ചായത്തുകളുടെ കുടിവെള്ളത്തിന് ആരംഭിച്ച പദ്ധതിയുടെ ശുദ്ധീകരണ പ്ലാന്റിന്റെ നിര്‍മാണം നിലച്ചിട്ട് രണ്ടുവര്‍ഷമാകുന്നു. 2012 ല്‍ ആരംഭിച്ച പദ്ധതിയുടെ പൈപ്പിടല്‍, ടാങ്ക്, കിണര്‍ എന്നിവയെല്ലാം പൂര്‍ത്തിയായിട്ട് ഒരു വര്‍ഷം കഴിഞ്ഞു. ട്രീറ്റ്‌മെന്റ് പ്ലാന്റ് പൂര്‍ത്തിയായാല്‍ കമ്മിഷന്‍ ചെയ്യാമെങ്കിലും ഒന്നര വര്‍ഷമായി ഇതിന്റെ പണി നടക്കുന്നില്ല. 60 കോടിയോളം രൂപ ചെലവ് വരുന്നതാണ് പദ്ധതി. ഇത് പൂര്‍ത്തിയായാല്‍ മുളിയാര്‍, ചെങ്കള, മധൂര്‍, മൊഗ്രാല്‍പുത്തൂര്‍ പഞ്ചായത്തുകളിലെ നൂറുകണക്കിനാളുകള്‍ക്ക് കുടിവെള്ളമെത്തും. 2014 ലാണ് ബോവിക്കാനത്ത് ശുദ്ധീകരണ പ്ലാന്റിന്റെ പണി തുടങ്ങിയത്. 2015 മെയ് വരെ ഇവിടെ പണി നടന്നെങ്കിലും എസ്റ്റിമേറ്റ് പുതുക്കി നല്‍കണമെന്ന ആവശ്യം അംഗീകരിക്കാത്തതിനാല്‍ കരാറുകാരന്‍ പണി നിര്‍ത്തുകയായിരുന്നു. പിന്നീട് പുനരാരംഭിക്കാന്‍ വാട്ടര്‍ അതോറിറ്റിയുടെ ഭാഗത്തുനിന്ന് ശ്രമമുണ്ടായില്ല. ട്രീറ്റ്‌മെന്റ് പ്ലാന്റൊഴിച്ച് ബാക്കിയുള്ള പണിയെല്ലാം തീര്‍ന്നിരുന്നു. എന്നാല്‍ പദ്ധതി കമ്മിഷന്‍ ചെയ്യാന്‍ കഴിയാത്തതിനാല്‍ കോടികളുടെ നഷ്ടമാണു സര്‍ക്കാരിനുണ്ടാകുന്നത്. ഇരിയണ്ണി, ബോവിക്കാനം, ചെര്‍ക്കള, പാറക്കട്ട, ബദിരടുക്ക എന്നിവിടങ്ങളിലെല്ലാം ടാങ്ക് നിര്‍മിച്ചിട്ടുണ്ട്. കമ്മിഷന്‍ ചെയ്യാന്‍ വൈകിയാല്‍ ഇവയെല്ലാം ഉപയോഗശൂന്യമാകുമെന്ന ആശങ്കയുമുണ്ട്.
കാസര്‍കോട് മുനിസിപ്പാലിറ്റി, ചെമ്മനാട് പഞ്ചായത്ത് എന്നിവിടങ്ങളിലെ കുടിവെള്ള വിതരണ പദ്ധതിക്ക് സംസ്ഥാന സര്‍ക്കാര്‍ 76 കോടി രൂപയുടെ അനുമതി നല്‍കിയിട്ടുണ്ട്. ഈ പദ്ധതിക്കുകൂടി ഉപകരിക്കുന്ന രീതിയില്‍ പണി ആരംഭിച്ച ട്രീറ്റ്‌മെന്റ് പ്ലാന്റ് മാറ്റാനുള്ള ആലോചനയും നടക്കുന്നുണ്ട്. ഈ പദ്ധതിയും നീണ്ടുപോവുകയാണ്. എന്നാല്‍ ആദ്യം ട്രീറ്റ്‌മെന്റ് പ്ലാന്റ് നിര്‍മിച്ചാല്‍ വലിയ താമസമില്ലാതെ പഴയ പദ്ധതി കമ്മീഷന്‍ ചെയ്യാനാകുമെന്നാണ് ജനങ്ങള്‍ പറയുന്നത്.