ഉപ്പള: മജിബയലില്‍ തെരുവുനായശല്യം രൂക്ഷമാവുന്നു. കൂട്ടില്‍ കെട്ടിയിരിക്കുകയായിരുന്ന അഞ്ച് ആടുകളെ തെരുവു നായക്കൂട്ടം കടിച്ചു കൊന്നു. ഇന്നലെ പുലര്‍ച്ചെ മൂന്നോടെയാണ് ഉപ്പള മജിബയലിലെ അയ്യൂബിന്റെ വീട്ടില്‍ കെട്ടിയിരിക്കുകയായിരുന്ന അഞ്ചാടുകളെ കൂട്ടമായെത്തിയ ഇരുപതോളം നായകള്‍ കടിച്ചു കൊല്ലുകയായിരുന്നു. കൂട്ടില്‍ നിന്നും ആടുകളുടെ കരച്ചില്‍ കേട്ടതിനെ തുടര്‍ന്ന് വീട്ടുകാര്‍ എത്തിനോക്കിയപ്പോഴാണ് ഇരുപതോളം വരുന്ന തെരുവുനായ്ക്കള്‍ ചേര്‍ന്ന് ആടുകളെ ആക്രമിക്കുന്നത് കണ്ടത്. നായ്ക്കൂട്ടത്തെ ഓടിക്കുന്നതിനിടയില്‍ രണ്ടാടുകളെ കടിച്ചോടി. ശേഷം നടത്തിയ പരിശോധനയിലാണ് മുന്നാടുകള്‍ ചത്ത നിലയിലും ഒന്നിനെ പരുക്കേറ്റ് അവശ നിലയിലും കണ്ടെത്തിയത്. സമീപത്തുള്ള ഫ്‌ളാറ്റില്‍ നിന്നുള്ള ഭക്ഷണാവിശ്ഷടങ്ങള്‍ പ്രദേശത്തെ റോഡുകളില്‍ തള്ളുന്നത് മൂലം ഇവിടെ തെരുവുനായ്ക്കള്‍ പെറ്റുപെരുകുന്നതായി പ്രദേശവാസികള്‍ പഞ്ചായത്തധികൃതര്‍ക്കു പരാതിപ്പെട്ടിരുന്നെങ്കിലും നടപടി എടുക്കുന്നില്ലെന്നു നാട്ടുകാര്‍ പറയുന്നു.