കണ്ണൂര്‍: പയ്യാമ്പലം ബീച്ചില്‍ നടന്ന സംസ്ഥാന ബീച്ച് വോളിയില്‍ പുരുഷ വിഭാഗത്തില്‍ കോഴിക്കോടും വനിതാ വിഭാഗത്തില്‍ തിരുവനന്തപുരവും ചാംപ്യന്മാരായി. ആതിഥേയരായ കണ്ണൂരിനെ പരാജയപ്പെടുത്തിയാണ് കോഴിക്കോടിന്റെ ജയം.
സ്‌കോര്‍ (25- 21. 25-16). വയനാടിനെ തോല്‍പ്പിച്ചായിരുന്നു തിരുവനന്തപുരത്തിന്റെ കിരീട നേട്ടം. സ്‌കോര്‍ (25-13. 25-16). പുരുഷ വിഭാഗം ലൂസേഴ്‌സ് ഫൈനലില്‍ എറണാകുളത്തെ (25-18. 14-25. 15-12) ന് തോല്‍പ്പിച്ച് തൃശ്ശൂരും വനിതാ വിഭാഗത്തില്‍ തൃശ്ശൂരിനെ (25-18. 25-21) ന് തോല്‍പ്പിച്ച് എറണാകുളവും മൂന്നാംസ്ഥാനം നേടി.
പുരുഷ വിഭാഗത്തില്‍ ബെസ്റ്റ് അറ്റാക്കറായി എഷ്യന്‍ ബീച്ച് വോളിയില്‍ ഇന്ത്യയ്ക്കായി കളിച്ച കോഴിക്കോടിന്റെ റഹീമിനെയും വനിതാ വിഭാഗത്തില്‍ ഇന്ത്യന്‍ താരവും കെ.എസ്.ഇബി ടീം ക്യാപ്റ്റനുമായ തിരുവനന്തപുരത്തിന്റെ എസ്. രേഖയെയും ബെസ്റ്റ് സെറ്റര്‍മാരായി കെ.എസ്.ഇ.ബിയുടെ ഇന്ത്യന്‍ താരം തിരുവനന്തപുരത്തിന്റെ കെ.എസ് ജിനിയെയും പുരുഷവിഭാഗത്തില്‍ കണ്ണൂരിന്റെ ജിന്‍ഷാദിനെയും തിരഞ്ഞെടുത്തു. കേരള സ്‌പോട്‌സ് കൗണ്‍സില്‍ വൈസ് പ്രസിഡന്റ് ഒ.കെ വിനീഷ് സമ്മാനദാനം നിര്‍വഹിച്ചു.