ബാഴ്‌സലോണ: അര്‍ജന്റൈന്‍ സൂപ്പര്‍ താരം ലയണല്‍ മെസ്സിക്ക് ലാലിഗയില്‍ 400 ഗോളിന്റെ തിളക്കം. ലാലിഗയില്‍ എയ്ബറിനെതിരേ നടന്ന മത്സരത്തിലാണ് ബാഴ്‌സലോണക്ക് വേണ്ടി മെസ്സി 400 ഗോളുകള്‍ സ്വന്തമാക്കിയത്. എതിരില്ലാത്ത മൂന്ന് ഗോളുകള്‍ക്കായിരുന്നു ബാഴ്‌സയുടെ ജയം.
ഇതില്‍ രണ്ട് ഗോളുകള്‍ സുവാരസിന്റെ വകയായിരുന്നു. ലാലിഗയില്‍ ബാഴ്‌സക്കായി ബൂട്ടുകെട്ടിയ 435 ാം മത്സരത്തിലാണ് മെസ്സി റെക്കോര്‍ഡിലേക്ക് പന്ത് അടിച്ചത്. ലാ ലിഗയില്‍ ഏറ്റവും കൂടുതല്‍ ഗോളുകള്‍ നേടിയ താരമെന്ന ബഹുമതിയും ഇപ്പോള്‍ മെസ്സിക്കാണ്. 311 ഗോളുകള്‍ നേടിയ ക്രിസ്റ്റ്യാനോ റൊണാള്‍ഡോയാണ് രണ്ടാം സ്ഥാനത്തുള്ളത്. വിവിധ ടൂര്‍ണമെന്റുകളിലായി ബാഴ്‌സയ്ക്ക് വേണ്ടി 658 മത്സരങ്ങള്‍ കളിച്ച മെസ്സി ഇതുവരെ 575 ഗോളുകള്‍ സ്വന്തമാക്കി.
ഈ സീസണില്‍ മെസ്സി ആകെ 23 ഗോളുകള്‍ ബാഴ്‌സയ്ക്കായി നേടി. ഇതില്‍ 17 ഗോളുകളും ലാലിഗയിലായിരുന്നു. സീസണില്‍ യൂറോപ്പിലെ ഗോള്‍വേട്ടക്കാരില്‍ മുന്നിലുള്ളതും ഇപ്പോള്‍ മെസ്സിയാണ്. യൂറോപ്പില്‍ മുന്‍നിരയിലുള്ള അഞ്ച് ലീഗുകളില്‍ ആദ്യമായാണ് ഒരു താരം ഒരു ലീഗില്‍ മാത്രമായി 400 ഗോളുകള്‍ നേടുന്നത്. ബുണ്ടസ് ലിഗയില്‍ ജെറാഡ് മുള്ളറുടെ 365 ഗോളുകള്‍, പ്രീമിയര്‍ ലീഗില്‍ അലന്‍ ഷിയററുടെ 260 ഗോളുകള്‍, സീരി എയില്‍ സ്വിലിയോ പിയോളയുടെ 274 ഗോളുകള്‍ എന്നിവയാണ് മറ്റുലീഗുകളിലെ ടോപ്‌സ്‌കോറുകള്‍. ഇന്നലെ നടന്ന മത്സരത്തില്‍ 19, 59 മിനുട്ടുകളിലാണ് സുവാരസ് ബാഴ്‌സക്കായി ലക്ഷ്യം കണ്ടത്. ജയത്തോടെ 19 മത്സരത്തില്‍ നിന്ന് ബാഴ്‌സക്ക് 43 പോയിന്റായി.