കോട്ടയം: മറ്റക്കര ടോംസ് എന്‍ജിനിയറിങ് കോളജിന്റെ പ്രവര്‍ത്തനത്തില്‍ ആശങ്കയെന്ന് സംസ്ഥാന യുവജന കമ്മിഷന്‍. വിദ്യാഭ്യാസത്തിന് ഏറെ പ്രധാന്യം നല്‍കുന്ന കേരളത്തില്‍ ഇത്തരത്തില്‍ ഒരു കോളേജ് പ്രവര്‍ത്തിക്കുന്നതില്‍ അദ്ഭുതമുണ്ടെന്ന് കമ്മിഷന്‍ പറഞ്ഞു. വിദ്യാര്‍ഥികളുടെ പ്രശ്‌നങ്ങള്‍ പരിശോധിച്ച് ഒരു മാസത്തിനകം റിപ്പോര്‍ട്ട് സമര്‍പ്പിക്കാന്‍ ചിന്താ ജെറോമിന്റെ അധ്യക്ഷതയിലുളള കമ്മിഷന്‍ കെ.ടി.യു, കുസാറ്റ് എന്നിവയ്ക്ക് നിര്‍ദേശം നല്‍കി.
  കോളജ് കെട്ടിടം, ലൈബ്രറി, ഫര്‍ണ്ണിച്ചറുകള്‍ എന്നിവ മാനദണ്ഡങ്ങള്‍ അനുസരിക്കുന്നുണ്ടോയെന്ന് പരിശോധിച്ച് റിപ്പോര്‍ട്ട് നല്‍കാനാണ് കമ്മിഷന്റെ നിര്‍ദേശം.
ഫീസ് ഘടന, ഫീസ് പിരിവ് എന്നിവനിലവിലുള്ള നിയമങ്ങളും ചട്ടങ്ങളും കൃത്യമായി പാലിച്ചു കൊണ്ടാണോ നടപ്പാക്കുന്നത് എന്ന് ഉറപ്പാക്കണമെന്നും കെ.ടി.യുവിന് നിര്‍ദേശം നല്‍കിയിട്ടുണ്ട്. കോളേജിന്റെ അഫിലിയേഷന്‍, നടത്തിപ്പ് എന്നിവ സംബന്ധിച്ച് ഉചിതമായ നടപടി സ്വീകരിക്കുന്നതിന് കമ്മിഷന്‍ സര്‍ക്കാരിനും റിപ്പോര്‍ട്ട് നല്‍കുമെന്ന് ചെയര്‍പേഴ്‌സണ്‍ പറഞ്ഞു.
          ഹോസ്റ്റലില്‍ രാത്രിയുള്ള കോളേജ് ചെയര്‍മാന്റെ പരിശോധന,അശ്ലീലച്ചുവയോടെയുള്ളസംസാരം എന്നിവ സംബന്ധിച്ച് പെണ്‍കുട്ടികളുടെ പരാതിയില്‍ കമ്മിഷന്റെ നിര്‍ദേശാനുസരണം കേസെടുത്ത് അന്വേഷിക്കുകയാണ്. കോളജും ഹോസ്റ്റലും കമ്മിഷന്‍ സംഘം നേരിട്ട് സന്ദര്‍ശിക്കുകയും സൗകര്യങ്ങള്‍ തീര്‍ത്തും അപര്യാപ്തമെന്ന് കണ്ടെത്തുകയും ചെയ്തതിനെ തുടര്‍ന്നാണ് കൂടുതല്‍ അന്വേഷണത്തിന് നിര്‍ദേശം നല്‍കിയത്.