ശാസ്താംകോട്ട: വിശാഖപട്ടണത്തു നിന്നും വില്‍പനയ്ക്കായി കൊണ്ടുവന്ന കഞ്ചാവുമായി യുവതി പൊലിസ് പിടിയിലായി. ശക്തികുളങ്ങര കല്ലുംപുറത്ത് സരളാ സദനത്തില്‍ രാഹിലത (35) ആണ് ശാസ്താംകോട്ട പൊലിസിന്റെ പിടിയിലായത്. ഇവരുടെ കൈയില്‍ നിന്നും വില്‍പനക്കായി കൊണ്ടുവന്ന ആറരക്കിലോയോളം വരുന്ന കഞ്ചാവും പിടികൂടിയിട്ടുണ്ട്. പിടിയിലായ യുവതിയുടെ രണ്ടാം ഭര്‍ത്താവും നിരവധി കഞ്ചാവു കേസില്‍ പിടികൂടിയിട്ടുമുള്ള എഴുകോണ്‍ സ്വദേശി രാജേഷ് എന്ന സ്റ്റീഫനുമായി ചേര്‍ന്നാണ് ഇവര്‍ കഞ്ചാവ് കച്ചവടം നടത്തിവന്നിരുന്നത്. മന്‍പ് അഞ്ചു കിലോ കഞ്ചാവുമായി കരുനാഗപ്പള്ളി എക്‌സൈസും ഒന്നേകാല്‍ കിലോ കഞ്ചാവുമായി കൊല്ലം ഈസ്റ്റ് പൊലിസും പിടികൂടിയിട്ടുണ്ട്.  കൊല്ലം റൂറല്‍ ജില്ലാ പൊലിസ് മേധാവി ബി. അശോകന്റെ നേതൃത്വത്തിലുള്ള ഡി.എ.എന്‍.എസ്.എ.എഫ് ടീമും, ശാസ്താംകോട്ട സി.ഐ. വി.എസ് പ്രശാന്തിന്റെ നേതൃത്വത്തിലുള്ള പൊലിസും ചേര്‍ന്നാണ് രാവിലെ ശാസ്താംകോട്ട റെയില്‍വേ സ്റ്റേഷനില്‍ നിന്നും പിടികൂടിയത്. അന്ധ്രാപ്രദേശിലെ നക്‌സല്‍ മേഖലയില്‍ നിന്നും വാങ്ങിയ കഞ്ചാവ് മൂന്നു പായ്ക്കറ്റുകളിലാക്കി ശബരിമല സ്‌പെഷല്‍ ട്രെയിനില്‍ വരുമ്പോഴാണ് പിടിയിലാകുന്നത്. കൊട്ടാരക്കര ഡിവൈ.എസ്.പി എ. അശോകന്‍, ശാസ്താംകോട്ട എസ്.ഐ ആര്‍. രാജീവ്, സിവില്‍ പൊലിസ് ഓഫിസര്‍മാരായ പ്രീത, ചന്ദ്രമോഹന്‍, ശിവശങ്കരപ്പിള്ള, എസ്. ബിനോജ്, എ.സി ഷാജഹാന്‍, അജയകുമാര്‍, അനീസ്, ആഷിര്‍, രാധാകൃഷ്ണപിള്ള, സി.എസ്. ബിനു എന്നിവരും സംഘത്തിലുണ്ടായിരുന്നു.