ഗൂഡല്ലൂര്‍: ഈമാസം അഞ്ചിന് ഗൂഡല്ലൂര്‍ ഹുദൈബിയ്യയില്‍ നടക്കുന്ന എസ്.കെ.എസ്.എസ്.എഫ് നീലഗിരി ജില്ലാ സമ്മേളനം മദീനാ പാഷന്റെ പ്രചാരണാര്‍ഥം സമസ്ത ജില്ലാ നേതാക്കളുടെ നേതൃത്വത്തില്‍ മഹല്ല് തല പര്യടനം ആരംഭിച്ചു. കഴിഞ്ഞ ദിവസം പന്തല്ലൂര്‍ താലൂക്കിലെ ചെമ്പാലയില്‍ നിന്ന് തുടക്കം കുറിച്ച പര്യടനം കോഴിപ്പാലം, നാടുകാണി, ദേവാല, ഉപ്പട്ടി, പന്തല്ലൂര്‍, ചേരമ്പാടി, മണ്ണാത്തിവയല്‍, എരുമാട് എന്നിവിടങ്ങളില്‍ പര്യടനം നടത്തി പാട്ടവയലില്‍ സമാപിച്ചു. ഇന്ന് ഗൂഡല്ലൂര്‍ താലൂക്കിലെ ഒന്നാം മൈലില്‍ നിന്ന് തുടങ്ങി രണ്ടാംമൈല്‍, പാടന്തറ, ദേവര്‍ഷോല, ത്രി ഡിവിഷന്‍, ഒറ്റുവയല്‍, കുറ്റിമൂച്ചി, മേഫീല്‍ഡ്, നെല്ലാക്കോട്ട, വിലങ്ങൂര്‍ എന്നിവിടങ്ങളിലെ പര്യടനത്തിന് ശേഷം ബിതര്‍ക്കാട് സമാപിക്കും. പര്യടനത്തിന് സമസ്ത നേതാക്കളായ ഒ.കെ ഇമ്പിച്ചിക്കോയ തങ്ങള്‍, പി.കെ മുഹമ്മദലി ബാഖവി, എ.എം ശരീഫ് ദാരിമി, എസ്.കെ.എസ്.എസ്.എഫ് ജില്ലാ പ്രസിഡന്റ് ശുഐബ് നിസാമി, ജനറല്‍ സെക്രട്ടറി മുജീബ് റഹ്മാന്‍ മൗലവി എന്നിവര്‍ നേതൃത്വം നല്‍കി. മുഴുവന്‍ മഹല്ലു ഭാരവാഹികളെയും, ഖത്തീബുമാരെയും, സംഘടനാ നേതാക്കളെയും നേരില്‍കണ്ട് സമ്മേളന സന്ദേശമെത്തിക്കലാണ് പര്യടന ലക്ഷ്യം. മദീനാ പാഷന്‍ പ്രചാരണ ഉദ്ഘാടനം ചെമ്പാലയില്‍ സമസ്ത ജില്ലാ പ്രസിഡന്റ് ഒ.കെ ഇമ്പിച്ചിക്കോയ തങ്ങളാണ് നിര്‍വഹിച്ചത്.