ജിദ്ദ: വിവാഹ മോചനമാവശ്യപ്പെട്ട ഭാര്യയോട് പ്രതികാരം ചെയ്യുന്നതിന് അവരുടെ ഉടമസ്ഥതയിലുള്ള കാര്‍ ഉപയോഗിച്ച് ഭര്‍ത്താവ് 375 തവണ ഗതാഗത നിയമലംഘനം നടത്തിയ സംഭവത്തില്‍ യുവതിക്ക് ചുമത്തിയ പിഴകള്‍ റദ്ദാക്കി. ഇതിനു പുറമെ യുവതിയുടെ പേരില്‍ രേഖപ്പെടുത്തിയ മുഴുവന്‍ പിഴകളും ട്രാഫിക് ഡയറക്ടറേറ്റ് യുവാവിന്റെ പേരിലേക്ക് മാറ്റി. എകദേശം മൂന്നു ലക്ഷം റിയാല്‍ വരെയായിരുന്നു ട്രാഫിക് പിഴ യുവതിയുടെ പേരില്‍ ചുമത്തിയിരുന്നത്.

സഊദിയില്‍ വനിതകള്‍ക്ക് വാഹനമോടിക്കാനുള്ള അനുവാദമില്ലെങ്കിലും അവരുടെ പേരില്‍ വാഹനം രജിസ്റ്റര്‍ ചെയ്യാം. നിയമലംഘനം നടത്തിയത് ഭര്‍ത്താവാണെന്ന് കണ്ടെത്തിയതോടെ പിഴ അദ്ദേഹത്തോടു തന്നെ അടക്കാന്‍ ആവശ്യപ്പെടുകയായിരുന്നുവെന്ന് ജിദ്ദ ട്രാഫിക് ഡിപ്പാര്‍ട്ട്‌മെന്റ് മേധാവി ബ്രിഗേഡിയന്‍ സുലൈമാന്‍ അല്‍സകരിയ പറഞ്ഞു.

ആഴ്ചകള്‍ക്കിടെ 375 തവണ നിയമലംഘനം നടത്തിയതായി മൊബൈല്‍ നോട്ടിഫിക്കേഷന്‍ വന്നതോടെ അന്വേഷണം ആവശ്യപ്പെട്ട് നര്‍മൈന്‍ എന്ന യുവതി ജനുവരിയില്‍ ട്രാഫിക് അധികൃതരെ സമീപിച്ചു. അന്വേഷണമാവശ്യപ്പെട്ട് വീഡിയോ ക്ലിപ്പിലൂടെ നര്‍മൈന്റെ പിതാവും രംഗത്തെത്തുകയുണ്ടായി. വിവാഹമോചനമാവശ്യപ്പെട്ട് കേസ് ഫയല്‍ ചെയ്തതോടെയാണ് ഭര്‍ത്താവ് ഗതാഗത ലംഘനം നടത്തിയത്.

കേസ് ശ്രദ്ധയില്‍പെട്ട ഉടന്‍ തന്നെ പരാതിക്കാരിയില്‍ നിന്ന് വിവരങ്ങള്‍ ചോദിച്ചറിഞ്ഞ് ആവശ്യമായ നടപടിയെടുത്തതായി ജിദ്ദ ഗതാഗത വകുപ്പ് മേധാവി പറഞ്ഞു. പിഴ അടക്കാന്‍ ഭര്‍ത്താവിനോട് ആവശ്യപ്പെടുകയും വാഹനം ഉടമസ്ഥയെ തിരിച്ചേല്‍പ്പിച്ചതായും അദ്ദേഹം പറഞ്ഞു. പരാതിയിന്മേല്‍ ഉചിതമായ നടപടി സ്വീകരിച്ച ഗതാഗത വകുപ്പിന് നന്ദി അറിയിച്ച നര്‍മൈന്‍ വിവാഹമോചന നടപടികളുമായി മുന്നോട്ടുപോകുമെന്നും വ്യക്തമാക്കി.

ദമ്പതികളെ ഒരുമിപ്പിക്കാനുള്ള അനുരജ്ഞന സമിതിയുടെ ശ്രമം പരാജയപ്പെട്ടതോടെ വിവാഹമോചന കേസ് ഈ മാസം പകുതിയിലേക്ക് മാറ്റിവച്ചിരിക്കുകയാണ്. രണ്ടാം വിവാഹം ചെയ്ത ഭര്‍ത്താവിനോട് പ്രതികാരം ചെയ്യുന്നതിന് 2015ല്‍ മറ്റൊരു യുവതി സമാന രീതിയില്‍ നിയമലംഘനം നടത്തിയിരുന്നു. ഭര്‍ത്താവിന്റെ ഉടമസ്ഥതയിലുള്ള വാഹനമുപയോഗിച്ച് ഗതാഗതലംഘനം നടത്തി മൂന്നു ലക്ഷം റിയാല്‍ പിഴ വരുത്തിവയ്ക്കുകയായിരുന്നു.