തളിപ്പറമ്പ്: ദേശീയപാത വികസനത്തിനു വേണ്ടി കുടിയൊഴിപ്പിക്കപ്പെടുന്ന വ്യാപാരികള്‍ക്ക് രണ്ടുലക്ഷം രൂപവീതം നഷ്ടപരിഹാരം നല്‍കണമെന്ന് ഹൈക്കോടതി. ജില്ലയില്‍ റോഡ് വികസനത്തിന്റെ പേരില്‍ ആയിരത്തിലേറെ വ്യാപാരികളാണ് തൊഴില്‍ നഷ്ടപ്പെടുന്നത്.
ചെറുകിട വ്യാപാര രംഗത്ത് 30 വര്‍ഷത്തിലധികം ജോലി ചെയ്തവര്‍ യാതൊരു സാമ്പത്തിക സഹായവും ലഭിക്കാതെയാണ് വ്യാപാര സ്ഥാപനങ്ങള്‍ വിട്ടൊഴിയേണ്ടിവരുന്നത്. പ്രശ്‌നത്തിന് പരിഹാരംതേടി വ്യാപാരി വ്യവസായി സമിതിയുടെ നേതൃത്വത്തില്‍ കഴിഞ്ഞ നവംബറില്‍ കണ്ണൂരില്‍ അനിശ്ചിതകാല നിരാഹാര സമരവും നടത്തിയിരുന്നു. തുടര്‍ന്ന് ദേശീയപാത വികസനത്തിന് ഭൂമി ഏറ്റെടുക്കുമ്പോള്‍ ഭൂവുടമകള്‍ക്കും വാടക കെട്ടിടങ്ങളിലുള്ളവര്‍ക്കും നഷ്ടപരിഹാര പാക്കേജ് അനുവദിക്കുമെന്ന് സര്‍ക്കാര്‍ പാസാക്കിയ ഉത്തരവ് നടപ്പാക്കണമെന്നാവശ്യപ്പെട്ട്് വ്യാപാരി വ്യവസായി സമിതി തളിപ്പറമ്പ് ഏരിയാകമ്മിറ്റിയുടെ നേതൃത്വത്തിലാണ് വ്യാപാരികള്‍ കോടതിയെ സമീപിച്ചത്.
നഷ്ടപരിഹാരത്തിന് അര്‍ഹരായ വ്യാപാരികള്‍ തളിപ്പറമ്പ് താലൂക്ക് ഓഫിസിലെ മിനിസിവില്‍ സ്‌റ്റേഷനില്‍ പ്രവര്‍ത്തിക്കുന്ന നാഷണല്‍ ഹൈവേ അതോറിറ്റിയുടെ സ്‌പെഷ്യല്‍ ഡെപ്യൂട്ടി കലക്ടര്‍ക്ക് (എല്‍എ) അപേക്ഷ നല്‍കണം. മൂന്ന് വര്‍ഷം മുന്‍പ് 3എ നോട്ടിഫിക്കേഷനില്‍ പേര് പ്രസിദ്ധീകരിച്ച വ്യാപാരികള്‍ അവരുടെ രേഖകള്‍ സമര്‍പ്പിക്കണം. 2009-10, 2010-11, 2011-12 വര്‍ഷം സ്ഥാപനം നടത്തിയിരുന്നവര്‍ ബന്ധപ്പെട്ട രേഖകളും സമര്‍പ്പിക്കണം. തൊഴിലാളികളുണ്ടെങ്കില്‍ തൊഴില്‍വകുപ്പില്‍ രജിസ്റ്റര്‍ ചെയ്ത സര്‍ട്ടിഫിക്കറ്റും ഹാജരാക്കണം.