ന്യൂഡല്‍ഹി: ഇന്ത്യന്‍ വനിതാ ഗുസ്തി താരം വിനേഷ് ഫൊഗട്ടിന് ലോറസ് വേള്‍ഡ് സ്‌പോര്‍ട്‌സ് പുരസ്‌കാരത്തിന് നാമനിര്‍ദേശം. ഇതാദ്യമായാണ് ഒരു ഇന്ത്യന്‍ താരത്തിന് ലോറസ് അവാര്‍ഡ് നാമനിര്‍ദേശം ലഭിക്കുന്നത്. കായിക രംഗത്തെ ഓസ്‌കാര്‍ എന്ന് അറിയപ്പെടുന്ന അവാര്‍ഡാണിത്. കായിക രംഗത്ത് വമ്പന്‍ തിരിച്ചുവരവ് നടത്തിയവര്‍ക്കുള്ള 'ലോറസ് വേള്‍ഡ് കം ബാക്ക് ഓഫ് ദ് ഇയര്‍' കാറ്റഗറിയിലാണ് ഇന്ത്യന്‍ താരത്തെ നാമനിര്‍ദേശം ചെയ്തിട്ടുള്ളത്.

2016 ഒളിംപിക്‌സിനിടെ പരുക്കേറ്റ താരം പിന്നീട് മികച്ച തിരിച്ചുവരവാണ് നടത്തിയത്. കഴിഞ്ഞവര്‍ഷം നടന്ന കോമണ്‍വെല്‍ത്ത് ഗെയിംസ്, ജക്കാര്‍ത്ത ഏഷ്യന്‍ ഗെയിംസുകളില്‍ 50 കിലോ ഫ്രീ സ്‌റ്റൈല്‍ വിഭാഗത്തില്‍ വിനേഷ് ഇന്ത്യയ്ക്കായി സ്വര്‍ണം നേടി. ഏഷ്യന്‍ ഗെയിംസില്‍ സ്വര്‍ണം നേടുന്ന ആദ്യ ഇന്ത്യന്‍ വനിതാ താരം കൂടിയാണ് ഫോഗട്ട്. അവാര്‍ഡിന് നാമനിര്‍ദേശം ചെയ്തതില്‍ സന്തോഷമുണ്ടെന്നും തുടര്‍ന്നുള്ള സമയങ്ങളിലും രാജ്യത്തിന് വേണ്ടി കഴിയുന്നതെല്ലാം ആത്മാര്‍ഥതയോടെ ചെയ്യുമെന്നും ഫൊഗട്ട് പറഞ്ഞു.