തിരുവനന്തപുരം: അണ്‍ എയ്ഡഡ് വിദ്യാഭ്യാസ മേഖലയെ തകര്‍ക്കാനുള്ള നീക്കത്തില്‍ നിന്ന് സംസ്ഥാന സര്‍ക്കാര്‍ പിന്മാറണമെന്ന് കേരള അംഗീകൃത സ്‌കൂള്‍ മാനേജ്‌മെന്റ് അസോസിയേഷന്‍ സംസ്ഥാന സെക്രട്ടേറിയറ്റ് ആവശ്യപ്പെട്ടു. ഇതിന്റെ ഭാഗമായാണ് അണ്‍ എയ്ഡഡ് സ്‌കൂള്‍ ബസുകളുടെ നികുതി വര്‍ധിപ്പിക്കാന്‍ ബജറ്റില്‍ നിര്‍ദേശിച്ചിരിക്കുന്നത്.
സര്‍ക്കാര്‍ അണ്‍ എയ്ഡഡ് മേഖല നല്‍കുന്ന സംഭാവനകള്‍ കാണാതെപോകരുത്. ഇടതുസര്‍ക്കാര്‍ അധികാരത്തില്‍ വന്നതിനുശേഷം അണ്‍എയ്ഡഡ് മേഖലയെ തകര്‍ക്കുന്നതിനുള്ള ശ്രമങ്ങളാണ് നടക്കുന്നത്. ക്വാളിറ്റി ഇംപ്രൂവ്‌മെന്റ് പരിപാടികളില്‍ നിന്ന് ഒഴിവാക്കിയിട്ടും അണ്‍ എയ്ഡഡ് സ്‌കൂളുകളുടെ നിലവാരം തകര്‍ക്കാന്‍ കഴിയാതെവന്നതോടെ സാമ്പത്തികമായി തകര്‍ക്കാനാണ് സര്‍ക്കാര്‍ ശ്രമിക്കുന്നത്. സര്‍ക്കാരിന്റെ പുതിയ തീരുമാനത്തില്‍ പ്രതിഷേധിച്ച് 29ന് സെക്രട്ടേറിയറ്റ് ധര്‍ണ നടത്തുമെന്നും സംഘടനാ ഭാരവാഹികള്‍ പറഞ്ഞു.
യോഗത്തില്‍ കെ.ആര്‍.എസ്.എം.എ സംസ്ഥാന പ്രസിഡന്റ് പി.കെ മുഹമ്മദ് ഹാജി അധ്യക്ഷത വഹിച്ചു. മുജീബ് പൂളക്കല്‍, ആനന്ദ് കണ്ണശ, ആര്‍.എം ബഷീര്‍, പി.കെ ജാഫര്‍, ഷിജിന്‍ കലാം, സജീവന്‍ സംസാരിച്ചു.