കൊല്‍ക്കത്ത: എ.ടി.കെയുടെ ഹോം ഗ്രൗണ്ടില്‍ നടന്ന മത്സരത്തില്‍ കൊല്‍ക്കത്തക്ക് ദയനീയ പരാജയം. 3-1 എന്ന സ്‌കോറിന് ചെന്നൈയിന്‍ എഫ്.സിയോടാണ് എ.ടി.കെ പരാജയപ്പെട്ടത്.
നിര്‍ണായക മത്സരത്തില്‍ ജയം സ്വന്തമാക്കിയതോടെ ചെന്നൈയുടെ പ്ലേ ഓഫ് പ്രതീക്ഷകള്‍ സജീവമായി. ഏഴാം മിനുട്ടില്‍ റാഫേല്‍ അഗസ്‌തോയുടെ ഗോളോടെയായിരുന്നു ചെന്നൈയുടെ തുടക്കം. കളി പുരോഗമിക്കുന്നതിനിടെ 39ാം മിനുട്ടില്‍ ആന്ദ്രെ ശെംബ്രിയും ചെന്നൈയിന് വേണ്ടി ഗോള്‍ നേടി. 40-ാം മിനുട്ടില്‍ റോയ് കൃഷ്ണയിലൂടെ എ.ടി.കെ ഒരു ഗോള്‍ തിരിച്ചടിച്ച് സ്‌കോര്‍ 1-2 എന്ന നിലയിലാക്കി. 94-ാം മിനുട്ടില്‍ വാല്‍സ്‌കിസിന്റെ ഗോളില്‍ ചെന്നൈ 3-1 ന്റെ ജയം ഉറപ്പിക്കുകയായിരുന്നു. ജയത്തോടെ 16 മത്സരത്തില്‍ നിന്ന് ചെന്നൈക്ക് 25 പോയിന്റായി. പട്ടികയില്‍ അഞ്ചാം സ്ഥാനത്താണ് ചെന്നൈയിന്‍ ഉള്ളത്. ലീഗില്‍ രണ്ട് മത്സരം ബാക്കിയുള്ളതിനാല്‍ ചെന്നൈക്ക് പ്ലേ ഓഫ് പ്രതീക്ഷകള്‍ നിലനിര്‍ത്താം. മുംബൈ സിറ്റി, നോര്‍ത്ത് ഈസ്റ്റ് യുനൈറ്റഡ് എന്നീ ടീമുകള്‍ക്കെതിരേയാണ് ചെന്നൈയുടെ അടുത്ത മത്സരം.