കോഴിക്കോട്: വയനാട് എക്‌സൈസ് ഡെപ്യൂട്ടി കമ്മിഷണറുടെ വാഹനം എതിരേവന്ന ഓട്ടോയുമായി കൂട്ടിയിടിച്ച് ഓട്ടോഡ്രൈവര്‍ക്ക് പരുക്കേറ്റു. പുലര്‍ച്ചെ അഞ്ചരയോടെ മൂഴിക്കലിലാണ് അപകടം.
കോഴിക്കോട് നിന്നു വയനാട്ടിലേക്ക് പോവുകയായിരുന്ന ജീപ്പ് മൂഴിക്കലിലെ പോക്കറ്റ് റോഡില്‍ നിന്നും പ്രധാന റോഡിലേക്ക് കയറിയ ഓട്ടോയിലിടിക്കുകയയായിരുന്നു. ഇടിയുടെ ആഘാതത്തില്‍ ഓട്ടോ തലകീഴായി മറിഞ്ഞു. സംഭവത്തില്‍ മൂഴിക്കല്‍ സ്വദേശിയായ സജീഷിന് പരുക്കേറ്റു. സ്‌കൂള്‍ കുട്ടികളെ കൊണ്ടു പോകാനായി പുലര്‍ച്ചെ വീട്ടില്‍ നിന്ന് പുറപ്പെട്ടതാണ് സജീഷ്.
പരുക്കേറ്റ സജീഷിനെ സമീപത്തെ മരണവീട്ടിലെത്തിയ ആളുകളാണ് ആശുപത്രിയിലെത്തിച്ചത്. ജീപ്പ് സിറ്റി ട്രാഫിക് പൊലിസ് കസ്റ്റഡിയിലെടുത്ത് കേസ് രജിസ്റ്റര്‍ ചെയ്തു. വാഹനം ഇടിച്ചിട്ട് നിര്‍ത്താതെ പോവുകയായിരുന്നുവെന്നും പരുക്കേറ്റ സജീഷിനെ ആശുപത്രിയിലെത്തിക്കാനുള്ള സന്നദ്ധത പോലും എക്‌സൈസ് ഡെപ്യൂട്ടി കമ്മിഷണര്‍ കാണിച്ചില്ലെന്നും നാട്ടുകാര്‍ ആരോപിച്ചു.
അതേസമയം വാഹനമിടിച്ചുയുടനെ താനും ഡ്രൈവറും ചേര്‍ന്ന് ഓട്ടോ ഡ്രൈവറെ എഴുന്നേല്‍പ്പിച്ചെന്നും ജീപ്പിന്റെ പംബര്‍ ജാമായതിനാല്‍ മറ്റൊരു ഓട്ടോയില്‍ അയാളെ കയറ്റിവിടുകയായിരുന്നുവെന്നും നിര്‍ത്താതെ പോയെന്ന ആരോപണം തെറ്റാണെന്നും വയനാട് ഡെപ്യൂട്ടി എക്‌സൈസ് കമ്മിഷണര്‍ സുരേഷ് അറിയിച്ചു.
കൈയിലും കാലിലും തലയ്ക്കും പരുക്കേറ്റ സജീഷ് ഇഖ്‌റ ആശുപത്രിയില്‍ ചികിത്സയിലാണ്.