കാട്ടാക്കട: ശബരിമല സമരത്തിനിടെ കള്ളിക്കാട് പന്തയില്‍ ആര്‍.എസ്.എസ് പ്രവര്‍ത്തകന്റെ വീട് ആക്രമിച്ച കേസില്‍ രണ്ടു ഡി.വൈ.എഫ്.ഐ പ്രവര്‍ത്തകരെ നെയ്യാര്‍ഡാം പൊലിസ് അറസ്റ്റ് ചെയ്തു. ഉഴമലയ്ക്കല്‍ ചിറ്റുവീട്ടു മുറിയില്‍ തോളൂര്‍ വെട്ടയില്‍ മോതിരപ്പള്ളി വീട്ടില്‍ ഷാനു എന്ന ഷാന്‍ (24), പുളിമൂട് കട്ടറക്കോണം ഷാമിലാ മന്‍സിലില്‍ ജിയാസ് (25) എന്നിവരെയാണ് എസ്.ഐ എസ്. ശ്രീകുമാറും സംഘവും ചേര്‍ന്ന് അറസ്റ്റ് ചെയ്തത്. ഈ മാസം മൂന്നിന് രാത്രിയിലാണ് പന്ത നിരപ്പൂക്കാലയില്‍ ആര്‍.എസ്.എസ് പ്രവര്‍ത്തകനായ ഷിബുവിന്റെ വീടിന് നേരെ ആക്രമണം നടന്നത്. വീടിന് നേരെയുണ്ടായ ആക്രമണത്തിനിടയില്‍ മുന്നില്‍ പാര്‍ക്ക് ചെയ്തിരുന്ന കാറിനും ബൈക്കിനും നാശമുണ്ടാക്കിയിരുന്നു. പ്രതികള്‍ പ്രദേശത്തെ ഡി.വൈ.എഫ്.ഐ പ്രവര്‍ത്തകരാണെന്ന് പൊലിസ് പറഞ്ഞു. പ്രതികളെ കാട്ടാക്കട കോടതിയില്‍ ഹാജരാക്കി റിമാന്‍ഡ് ചെയ്തു.