കുണ്ടംകുഴി: തിരക്കിട്ട ജീവിതയാത്രയില്‍ റോഡപകടങ്ങള്‍ പതിവാകുന്ന ഈ കാലഘട്ടത്തില്‍ ട്രാഫിക് നിയങ്ങള്‍ പാലിക്കേണ്ടതിന്റെ ആവശ്യകത ചൂണ്ടിക്കാട്ടി കുണ്ടംകുഴി ഗവ. ഹയര്‍ സെക്കന്‍ഡറി സ്‌കൂള്‍ എസ്.പി.സി യൂനിറ്റിന്റെ നേതൃത്വത്തില്‍ ശുഭയാത്ര എന്ന പേരില്‍ ട്രാഫിക് ബോധവല്‍ക്കരണ പരിപാടി സംഘടിപ്പിച്ചു.
വാഹനയാത്രക്കാരെ കൈകാണിച്ചു നിര്‍ത്തി സ്‌നേഹപൂര്‍വം റോഡ് നിയമങ്ങള്‍ പാലിക്കാന്‍ നിര്‍ദേശിക്കുകയും ലഘുലേഖ വിതരണം ചെയ്യുകയും ചെയ്തു. രണ്ടു മണിമണിക്കൂര്‍ കൊണ്ട് 200ലധികം ചെറുതും വലുതുമായ വാഹനങ്ങള്‍ ഓടിക്കുന്ന ഡ്രൈവര്‍മാരെ ഇത്തരത്തില്‍ ബോധവല്‍ക്കരിച്ചു. പരിപാടി കാസര്‍കോട് എം.വി.ഐ ടി. വൈകുണ്ഠന്‍ ഉദ്ഘാടനം ചെയ്തു. സിവില്‍ പൊലിസ് ഓഫിസര്‍മാരായ സുകുമാരന്‍, മധുസൂദനന്‍, എസ്.പി.സി സി.പി.ഒ കെ. അശോകന്‍, ലീഡര്‍മാരായ അശ്വിന്‍, ഗായത്രി നേതൃത്വം നല്‍കി.