കൊട്ടിയം: സംസ്ഥാന ബജറ്റില്‍ കണ്ണനല്ലൂരിന് പൊലിസ് സ്റ്റേഷന്‍ അനുവദിച്ചു. തൃക്കോവില്‍വട്ടം പഞ്ചായത്ത് പരിധിയിലുള്ള കണ്ണനല്ലൂരില്‍ ഇപ്പോള്‍ പൊലിസ് ഔട്ട് പോസ്റ്റ് ഉണ്ടെങ്കിലും പ്രവര്‍ത്തനം ഫലപ്രദമല്ല. ഔട്ട് പോസ്റ്റില്‍ പരാതികള്‍ സ്വീകരിക്കാമെങ്കിലും തുടര്‍ നടപടി കൊട്ടിയം സ്‌റ്റേഷനിലേ ലഭ്യമാകുകയുള്ളൂ എന്നതാണ് പോരായ്മ.  പുതിയ സ്‌റ്റേഷന്‍ നിലവില്‍ വരുന്നതോടെ ഈ പ്രശ്‌നങ്ങള്‍ക്ക് പരിഹാരമാകും.
 കൊട്ടിയം, ചാത്തന്നൂര്‍, കുണ്ടറ എന്നീ സ്റ്റേഷനുകളുടെ അതിര്‍ത്തി പ്രദേശങ്ങള്‍ കൂടി ഉള്‍പ്പെടുത്തിയായിരിക്കും പുതിയ സ്റ്റേഷന്‍ രൂപീകരിക്കുക. താഴാംപണ, കുളപ്പാടം, പെരുമ്പുഴ തുടങ്ങിയ പ്രദേശങ്ങളും സ്‌റ്റേഷന്റെ പരിധിയില്‍ വരും. അഞ്ച് എസ്.ഐ, മൂന്ന് എ.എസ്.ഐ, 15 എസ്.സി.പി.ഒ, 19 സി.പി.ഒ, 5 വനിതാ സി.പി.ഒ എന്നിങ്ങനെ കൊട്ടിയം സ്റ്റേഷനിലെ അംഗസംഖ്യ തന്നെയാകും കണ്ണനല്ലൂര്‍ സ്റ്റേഷനും അനുവദിക്കുക.
ഗതാഗത പ്രശ്‌നങ്ങള്‍ക്കും സാമൂഹ്യ വിരുദ്ധ ശല്യങ്ങള്‍ക്കും പൊലിസ് സ്റ്റേഷന്‍ വരുന്നതോടെ പരിഹാരമാകുമെന്നാണ് പ്രതീക്ഷ.