തൃശൂര്‍: യാതൊരു മര്യാദയുമില്ലാതെ സാധാരണക്കാരുടെ മേല്‍ അടിച്ചേല്‍പ്പിക്കപ്പെടുന്ന ഹര്‍ത്താലുകള്‍ ജനാധിപത്യത്തിന്റെ മൂല്യം കെടുത്തുമെന്ന് സുകുമാര്‍ അഴീക്കോട് ഫൗണ്ടേഷന്‍ ചെയര്‍മാന്‍ എം.പി അബ്ദുസ്സമദ് സമദാനി അഭിപ്രായപ്പെട്ടു.
സുകുമാര്‍ അഴീക്കോട് ഫൗണ്ടേഷന്റെ സഹകരണത്തോടെ ഇരവിമംഗലത്ത് കേരള സാഹിത്യ അക്കാദമി സംഘടിപ്പിച്ച പരിപാടിയില്‍ അനുസ്മരണ പ്രഭാഷണം നടത്തുകയായിരുന്നു അദ്ദേഹം. നീതി ബോധത്തിന്റെ ക്ഷോഭമായിരുന്നു സുകുമാര്‍ അഴീക്കോടിന്റെ വാക്കുകള്‍. സാമൂഹിക വിചാരങ്ങളുടെ ബഹിര്‍ഗമന കവാടമായി നിലകൊണ്ടതാണ് അഴീക്കോടിന്റെ ഏറ്റവും വലിയ ജീവിത ദൗത്യമെന്നും സമദാനി പറഞ്ഞു.

അക്കാദമി സെക്രട്ടറി കെ.പി മോഹനന്‍ അധ്യക്ഷനായി. പ്രൊഫ. പി.എ വാസുദേവന്‍, ഡോ. സി. രാവുണ്ണി, അഡ്വ. പി.ആര്‍ രജിത്ത്, വിജേഷ് എടക്കുന്നി, ഉഷ ഉണ്ണികൃഷ്ണന്‍ സംബന്ധിച്ചു. ജയരാജ് വാര്യര്‍ സ്വാഗതവും കെ. രാജന്‍ നന്ദിയും പറഞ്ഞു.