ന്യൂഡല്‍ഹി: ജൂലൈമാസം പ്രധാനമന്ത്രി നരേന്ദ്രമോദി നടത്തുന്ന ഇസ്രാഈല്‍ സന്ദര്‍ശനം നയതന്ത്രതലത്തില്‍ ഇന്ത്യ സ്വീകരിക്കുന്ന പുതിയ നയത്തിന്റെ ഭാഗമെന്ന് വിലയിരുത്തല്‍.
മുന്‍കാലങ്ങളില്‍ ഇസ്രാഈല്‍ സന്ദര്‍ശിക്കുന്ന ഇന്ത്യന്‍ പ്രതിനിധികള്‍ ഫലസ്തീനും സന്ദര്‍ശിക്കാറുണ്ടായിരുന്നു. ഇരു രാജ്യങ്ങളോടും ഇന്ത്യ തുടരുന്ന സമദൂര കാഴ്ചപ്പാടിന്റെ ഭാഗമായിട്ടായിരുന്നു ഇത്.  ഇരു രാജ്യങ്ങളും തമ്മിലുള്ള പ്രശ്‌നങ്ങളില്‍ ഇന്ത്യ ഇതുവരെ ആരുടേയും പക്ഷം പിടിക്കാത്തതുകൊണ്ടാണ് രണ്ട് രാജ്യങ്ങളും സന്ദര്‍ശിക്കുന്ന പതിവ് തെറ്റിക്കാതിരുന്നത്.
ഫലസ്തീനിനെ പിന്തുണക്കുന്നതിനുപുറമെ ഇസ്രാഈലുമായി നല്ല ബന്ധം സ്ഥാപിക്കുകയെന്നതും ഇന്ത്യാ ഗവണ്‍മെന്റിന്റെ നിലപാടായിരുന്നു. 25 വര്‍ഷമായി തുടരുന്ന ഈ നിലപാടിന് മാറ്റം വരുന്നുവെന്നാണ് ഇപ്പോള്‍ വ്യക്തമായിക്കൊണ്ടിരിക്കുന്നത്. ഫലസ്തീനെ ഒഴിവാക്കി ഇസ്രാഈലില്‍ മാത്രം സന്ദര്‍ശനം നടത്തുകയെന്ന രീതിയിലേക്ക് മോദി എത്തിയത് പുതിയൊരു നയതന്ത്ര രീതിയെയായിരിക്കും വ്യക്തമാക്കുക. കഴിഞ്ഞ വര്‍ഷം ഫലസ്തിന്‍ സന്ദര്‍ശിച്ച വിദേശ കാര്യ സഹമന്ത്രി എം.ജെ. അക്ബര്‍ ആ രാജ്യവുമായി  നയതന്ത്രതലത്തില്‍ പ്രവര്‍ത്തിക്കാന്‍ ധാരണയിലെത്തിയിരുന്നു.
ഫലസ്തീനിലേക്കും സന്ദര്‍ശനം നീട്ടാതെ മോദി ഇസ്രാഈലില്‍ മാത്രം സന്ദര്‍ശനം നടത്താന്‍ തീരുമാനിച്ചത് രാജ്യന്തര തലത്തില്‍ തന്നെ പുതിയ നീക്കമായാണ് വിലയിരുത്തപ്പെടുന്നത്.