മലപ്പുറം: ബി.എന്‍ മല്ലിക് മെമ്മോറിയല്‍ ആള്‍ ഇന്ത്യ പൊലിസ് ഫുട്‌ബോള്‍ ചാംപ്യന്‍ഷിപ്പ് 28 മുതല്‍ മലപ്പുറത്ത്. രാജ്യത്തെ സംസ്ഥാന പൊലിസ്, യൂണിറ്റി ടെറിറ്റോറിയല്‍ പൊലിസ്, കേന്ദ്ര പൊലിസ് സേനകളടക്കം 37 ടീമുകളാണ് മലപ്പുറത്തെ കോട്ടപ്പടി സ്റ്റേഡിയം, നിലമ്പൂര്‍ എം.എസ്.പി മൈതാനം, പാണ്ടിക്കാട് എ.ആര്‍ ക്യാംപ്, ക്ലാരി ആര്‍.ആര്‍.ആര്‍.എഫ് ക്യാംപ് എന്നിവിടങ്ങളില്‍ മത്സരിക്കുക. എട്ടു ഗ്രൂപ്പുകളാക്കി തിരിച്ച് ലീഗ് അടിസ്ഥാനത്തിലാണ് പ്രാഥമിക റൗണ്ട് മത്സരങ്ങള്‍. ഇതില്‍നിന്ന് ആദ്യ രണ്ടു സ്ഥാനക്കാര്‍ പ്രീക്വാര്‍ട്ടറിലേക്ക് പ്രവേശിക്കും. പിന്നീട് നോക്കൗട്ട് രീതിയിലാണ് മത്സരങ്ങള്‍. 28ന് വൈകുന്നേരം നാലിന് മലപ്പുറം എം.എസ്.പി പരേഡ് ഗ്രൗണ്ടില്‍ നടക്കുന്ന ഉദ്ഘാടന ചടങ്ങില്‍ എയര്‍മാര്‍ഷല്‍ മാനവേന്ദ്ര സിങ് മുഖ്യാതിഥിയാകും.