കൊച്ചി: സിനിമയിലല്ലായിരുന്നെങ്കില്‍ തന്നിലും കാലം വരുത്തിയ മാറ്റമുണ്ടാകുമായിരുന്നെന്നു നടന്‍ മമ്മൂട്ടി. മഹാരാജാസ് കോളജ് പൂര്‍വ വിദ്യാര്‍ഥികളുടെ സംഗമമായ 'മഹാരാജകീയ'ത്തില്‍ സംസാരിക്കുകയായിരുന്നു അദ്ദേഹം. ഒപ്പം പഠിച്ചവരുടെ എല്ലാവരുടേയും മുഖം ഓര്‍മയുണ്ട്. പലപ്പോഴും ആ മുഖങ്ങള്‍ തിരയാറുണ്ട്. എന്നാല്‍ കാണാന്‍ കഴിയാറില്ല. കാരണം കാലം എല്ലാവരിലും ഒരുപാട് മാറ്റം വരുത്തി. തന്നിലും മാറ്റം വരുത്തിയിട്ടുണ്ട്. മുഖംമൂടി അഴിച്ചുവെച്ചാല്‍ താനും എല്ലാവരേയും പോലെയാകും. ആ മുഖംമൂടി എന്താണെന്ന കാര്യം ഇപ്പോള്‍ പറയാന്‍ കഴിയില്ലെന്നും മമ്മൂട്ടി പറഞ്ഞു.
മഹാരാജാസില്‍ പഠിച്ച ശേഷം ലോകോളജില്‍ ചേര്‍ന്നെങ്കിലും കൂടുതല്‍ സമയവും മഹാരാജാസ് കോളജിലായിരുന്നു ചെലവഴിച്ചതെന്നും അദ്ദേഹം പറഞ്ഞു. കിട്ടാതെപോയ പ്രണയിനിയോടു തോന്നിയ വികാരമായിരുന്നു അന്ന് മഹാരാജാസിനോടെന്ന് മമ്മൂട്ടി പറഞ്ഞു.  ഒപ്പം പഠിച്ചവരെ കാണാനും അവരോടൊപ്പം ചെലവഴിക്കാനും മമ്മൂട്ടി സമയം കണ്ടെത്തി.