മരട്: നെട്ടൂര്‍ നോര്‍ത്തില്‍ നിന്നും സര്‍വീസ് നടത്തിയിരുന്ന നഗരസഭയുടെ അശ്വമേധം ബസ് മുടങ്ങിയതിനാല്‍ ഈ പ്രദേശത്തെ യാത്രക്കാര്‍ ദുരിതത്തിലായി. വിദ്യാര്‍ഥികള്‍ ഉള്‍പ്പെടെയുളള നൂറ് കണക്കിന് യാത്രക്കാര്‍ ഒരു കിലോമീറ്ററോളം നടന്നാണ് ബസ്സ് സ്റ്റോപ്പുകളില്‍ എത്തുന്നത്. കുണ്ടന്നൂര്‍ തേവര ബ്രിഡ്ജിന്റെ പടവുകള്‍ കയറി വേണം നെട്ടൂര്‍ ഐ.എന്‍.ടി.യു.സി, പള്ളി സ്റ്റോപ്പുകളില്‍ എത്താന്‍. എത്രയും വേഗം ബസ് സര്‍വീസ് പുനരാരംഭിക്കണമെന്നും അത് വരെ താല്കാലികമായി മറ്റു ബസുകള്‍ക്ക് പെര്‍മിറ്റ് നല്‍കി ഈ പ്രദേശത്തെ യാത്ര ക്ലേശം പരിഹരിക്കണമെന്ന് നാട്ടുകാര്‍ ആവശ്യപ്പെട്ടു.
നഗരസഭയുടെ ബസ് കരാറുകാരന്‍ വാടക നല്‍ക്കത്തതിനെ തുടര്‍ന്ന് കഴിഞ്ഞ ദിവസം നഗര സഭ അധികൃധര്‍ പിടിച്ചെടുത്തതതാണ് സര്‍വീസ് മുടങ്ങിയത്.
മരട് ഗ്രാമ പഞ്ചായത്തായിരുന്നപ്പോള്‍ അന്നത്തെ പഞ്ചായത്ത് പ്രസിഡന്റും നിലവില്‍ നഗരസഭ ആക്ടിങ്ങ് ചെയര്‍മാനുമായ കെ.എ ദേവസി കേരളത്തിലെ തദ്ദേശ സ്വയം ഭരണ സ്ഥാപനങ്ങള്‍ക്ക് മാതൃകയായി പത്ത് കുടുംബശ്രീ സഹോദരിമാരില്‍ നിന്നും 10,000 രുപ വീതം മൂലധനമായി സ്വീകരിച്ച് പഞ്ചായത്ത് സെക്രട്ടറിയുടെ പേരില്‍ വാങ്ങി സര്‍വീസ് ആരംഭിച്ചതാണ് അശ്വമേധം ബസ്. പുതിയ വാടക കരാര്‍ പ്രകാരം ടെന്‍ണ്ടര്‍ വിളിച്ച് നടപടി പൂര്‍ത്തിയാക്കി ബസ് സര്‍വ്വീസ് പുനരാരംഭിക്കുമെന്ന് നഗരസഭ ആക്ടിംഗ് ചെയര്‍മാന്‍ കെ.എ ദേവസി പറഞ്ഞു.