മൂന്നാര്‍: കാട്ടാനയുടെ ആക്രമണത്തില്‍ സ്‌കൂള്‍ ഗേറ്റ് തകര്‍ന്നു. കെ.ഡി.എച്ച്.പി കമ്പനി കല്ലാര്‍ എസ്റ്റേറ്റിലെ ഗവണ്‍മെന്റ് യു.പി സ്‌കൂളിന്റെ ഗേറ്റാണ് കാട്ടാന തകര്‍ത്തത്.
ബുധനാഴ്ച രാത്രിയെത്തിയ കാട്ടാന സ്‌കൂള്‍ മുറ്റത്തേക്ക് കടക്കാനുള്ള ശ്രമത്തിനിടയില്‍ ഇരുമ്പുകൊണ്ടുള്ള ഗേറ്റ് തള്ളിതാഴെയിടുകയായിരുന്നു. രാത്രി ഒന്നരയോടെ സ്‌കൂള്‍ പരിസരത്തെത്തിയ കാട്ടാന പുലര്‍ച്ചെവരെ സ്‌കൂള്‍ മുറ്റത്ത് നിലയുറപ്പിച്ച ശേഷമാണ് കാട്ടിലേക്ക് മടങ്ങിയത്. തോട്ടം തൊഴിലാളികളുടെ കുട്ടികള്‍ പഠിക്കുന്ന സ്‌കൂളാണിത്. സ്‌കൂള്‍ പരിസരത്ത് ആന എത്തിയെന്നറിഞ്ഞതോടെ എസ്‌റ്റേറ്റിലെ തൊഴിലാളികള്‍ ഇന്നലെ ആശങ്കയോടെയാണ് കുട്ടുകളെ സ്‌കൂളിലേക്ക് അയച്ചത്. സ്‌കൂളില്‍ കൂടുതല്‍ സുരക്ഷാ സംവിധാനങ്ങള്‍ ഏര്‍പ്പെടുത്തണമെന്ന് രക്ഷിതാക്കള്‍ ആവശ്യപ്പെട്ടു. സ്‌കൂള്‍ ഹെഡ്മാസ്റ്റര്‍ എസ്.റ്റി. രാജ് പഞ്ചായത്ത് - ഫോറസ്റ്റ് അധികൃതര്‍ക്ക് പരാതി നല്‍കി.