മലപ്പുറം: സമസ്ത കേരള സുന്നി മഹല്ല് ഫെഡറേഷന്‍ സംസ്ഥാന ഉമറാ കോണ്‍ഫറസ് നാളെ ദാറുല്‍ഹുദാ ഇസ്‌ലാമിക് സര്‍വകലാശാലയില്‍ പ്രത്യേകം സജ്ജമാക്കിയ വാദീ അറഫയില്‍ നടക്കും. സംസ്ഥാനത്തെ ആറായിരം മഹല്ല് പ്രതിനിധികള്‍ സംബന്ധിക്കുന്ന കോണ്‍ഫറന്‍സിന്റെ മുഴുവന്‍ ഒരുക്കങ്ങളും പൂര്‍ത്തിയായതായി ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു.
എസ്.എം.എഫിന്റെ പ്രവര്‍ത്തനങ്ങള്‍ക്ക് പുതിയ മേഖലകളും രീതികളും കണ്ടെത്തുന്നതിനായി 2017 ഏപ്രിലില്‍ തൃശൂരില്‍ നടത്തിയ വാദി ഖുബായുടെയും കഴിഞ്ഞ വര്‍ഷം ഏപ്രിലില്‍ കാസര്‍കോട് കൈതക്കാട് സംഘടിപ്പിച്ച ലൈറ്റ് ഓഫ് മദീനയുടെയും തുടര്‍ച്ചയാണ് നാളെ ദാറുല്‍ഹുദായില്‍ നടക്കുന്ന സംസ്ഥാന മഹല്ല് പ്രതിനിധി സംഗമം. സംതൃപ്ത കുടുംബം, ധനകാര്യം: വിനിമയവും വിശുദ്ധിയും, സംഘര്‍ഷ രഹിത സമൂഹം തുടങ്ങിയ കാലിക പ്രസക്തമായ വിഷയങ്ങളാണ് സംഗമത്തില്‍ ചര്‍ച്ച ചെയ്യുക.
കോണ്‍ഫറന്‍സിന്റെ മുന്നോടിയായി രാവിലെ ഒന്‍പതിന് സൈനുല്‍ ഉലമാ ചെറുശ്ശേരി സൈനുദ്ദീന്‍ മുസ്‌ലിയാര്‍, ഡോ. യു. ബാപ്പുട്ടി ഹാജി എന്നിവരുടെ മഖ്ബറ സിയാറത്ത് നടക്കും. സമസ്ത കേന്ദ്ര മുശാവറാംഗം ഹാജി. എ. മരക്കാര്‍ ഫൈസി സിയാറത്തിന് നേതൃത്വം നല്‍കും. എസ്.എം.എഫ് സംസ്ഥാന ജന.സെക്രട്ടറി ചെമ്മുക്കന്‍ കുഞ്ഞാപ്പുഹാജി പതാക ഉയര്‍ത്തും.
സംസ്ഥാന പ്രസിഡന്റ് പാണക്കാട് സയ്യിദ് ഹൈദരലി ശിഹാബ് തങ്ങള്‍ കോണ്‍ഫറന്‍സ് ഉദ്ഘാടനം ചെയ്യും. സമസ്ത പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ അധ്യക്ഷനാവും. സമസ്ത ജന. സെക്രട്ടറി കെ. ആലിക്കുട്ടി മുസ്‌ലിയാര്‍ മുഖ്യ പ്രഭാഷണം നടത്തും. യു. ശാഫി ഹാജി ആമുഖ പ്രഭാഷണം നടത്തും. സാദിഖലി ശിഹാബ് തങ്ങള്‍, അബ്ബാസലി ശിഹാബ് തങ്ങള്‍, ഹമീദലി ശിഹാബ് തങ്ങള്‍, പി.കെ.പി അബ്ദുസ്സലാം മുസ്‌ലിയാര്‍, സി.കെ.എം സ്വാദിഖ് മുസ്‌ലിയാര്‍, ത്വാഖാ അഹ്മദ് മൗലവി, എം.പി കുഞ്ഞി മുഹമ്മദ് മുസ്‌ലിയാര്‍, യു.എം അബ്ദുറഹ്മാന്‍ മുസ്‌ലിയാര്‍, ഒ.ടി മൂസ മുസ്‌ലിയാര്‍, എ.വി അബ്ദുറഹ്മാന്‍ മുസ്‌ലിയാര്‍, വാക്കോട് മൊയ്തീന്‍ കുട്ടി ഫൈസി, കെ.ടി ഹംസ മുസ്‌ലിയാര്‍, ചെറുവാളൂര്‍ ഹൈദ്രോസ് മുസ്‌ലിയാര്‍, പി.കെ കുഞ്ഞാലിക്കുട്ടി എം.പി, ഇ.ടി മുഹമ്മദ് ബഷീര്‍ എം.പി, ഡോ. യു.വി.കെ മുഹമ്മദ്, അബ്ദുല്‍ ഹമീദ് ഫൈസി അമ്പലക്കടവ്, ഡോ. എന്‍.എ.എം അബ്ദുല്‍ ഖാദിര്‍, അബ്ദുല്ല മാസ്റ്റര്‍ കൊട്ടപ്പുറം, എസ്.കെ ഹംസ ഹാജി പയ്യന്നൂര്‍, സത്താര്‍ പന്തലൂര്‍, കെ. മോയിന്‍ കുട്ടി മാസ്റ്റര്‍, എം.എ ചേളാരി, പി.കെ മുഹമ്മദ് ഹാജി പങ്കെടുക്കും. തുടര്‍ന്ന് ലൈറ്റ് ഓഫ് മദീന റിവ്യു വിഷ്വല്‍ നടക്കും. ശംസുദ്ദീന്‍ മാസ്റ്റര്‍ ഒഴുകൂര്‍ അവതരണം നടത്തും. മെട്രോ മുഹമ്മദ് ഹാജി, പ്രൊഫ. തോന്നക്കല്‍ ജമാല്‍ സംബന്ധിക്കും.
11.30ന് ആരംഭിക്കുന്ന ഒന്നാം സെഷന്‍ 'സംതൃപ്ത കുടുംബം' കേരള വഖ്ഫ് ബോര്‍ഡ് ചെയര്‍മാന്‍ റശീദലി ശിഹാബ് തങ്ങള്‍ ഉദ്ഘാടനം ചെയ്യും. എം.ടി അബ്ദുല്ല മുസ്‌ലിയാര്‍ അധ്യക്ഷനാവും. അബ്ദുസ്സമദ് പൂക്കോട്ടൂര്‍, എസ്.വി മുഹമ്മദലി, ഹകീം മാസ്റ്റര്‍ മാടക്കല്‍ വിഷയാവതരണം നടത്തും. ഉച്ചക്ക് രണ്ടിന് 'ധനകാര്യം: വിനിമയവും വിശുദ്ധിയും' സെഷന്‍ ടി.കെ പൂക്കോയ തങ്ങള്‍ ചന്തേര ഉദ്ഘാടനം ചെയ്യും. ഉമര്‍ ഫൈസി മുക്കം അധ്യക്ഷനാവും. ളിയാഉദ്ദീന്‍ ഫൈസി മേല്‍മുറി, മുനീര്‍ ഹുദവി ഫറോക്ക്, അബ്ദുറഹ്മാന്‍ പിലാത്തറ വിഷയാവതരണം നടത്തും.
3.15ന് സംഘര്‍ഷ രഹിത സമൂഹം സെഷന്‍ സയ്യിദ് മുഹമ്മദ് കോയ തങ്ങള്‍ ജമലുല്ലൈലി ഉദ്ഘാടനം ചെയ്യും. പി.പി ഉമര്‍ മുസ്‌ലിയാര്‍ കൊയ്യോട് അധ്യക്ഷനാകും. ആദൃശ്ശേരി ഹംസക്കുട്ടി മുസ്‌ലിയാര്‍, ബശീര്‍ വള്ളിക്കുന്ന്, ഡോ. സുബൈര്‍ ഹുദവി ചേകനൂര്‍ വിഷയാവതരണം നടത്തും.
സമാപന സെഷനില്‍ ഡോ.ബഹാഉദ്ദീന്‍ മുഹമ്മദ് നദ്‌വി വാദീ അറഫ സന്ദേശം നല്‍കും. സമാപന പ്രാര്‍ഥനക്ക് എം.എം മുഹ്‌യിദ്ദീന്‍ മുസ്‌ലിയാര്‍ നേതൃത്വം നല്‍കും.
വാര്‍ത്താസമ്മേളനത്തില്‍ ഡോ.ബഹാഉദ്ദീന്‍ മുഹമ്മദ് നദ്‌വി, കെ.എം സൈദലവി ഹാജി കോട്ടക്കല്‍, യു. ശാഫി ഹാജി ചെമ്മാട്, അബ്ദുസ്സമദ് പൂക്കോട്ടൂര്‍, സി.ടി അബ്ദുല്‍ ഖാദിര്‍ തൃക്കരിപ്പൂര്‍ പങ്കെടുത്തു.