മണ്ണാര്‍ക്കാട്: കഴിഞ്ഞ തിങ്കളാഴ്ച ഒഴുക്കില്‍പ്പെട്ടെത്തിയ കാട്ടാനക്കുട്ടിയെ കൊണ്ടുപോവുന്ന കാര്യത്തില്‍ ഇന്ന് തീരുമാനമെടുക്കും. വനംവകുപ്പിന്റെ വിദഗ്ധ ഡോക്ടര്‍മാര്‍ സ്ഥലത്തെത്തി കാട്ടാനക്കുട്ടിയെ പരിശോധിച്ച് ആരോഗ്യ സ്ഥിതി വിലയിരുത്തിയ ശേഷം കോടനാട്ടേക്കൊ മുത്തങ്ങയിലേക്കോ കൊണ്ടുപോയേക്കും.
നിലവില്‍ ആനക്കുട്ടി ആനമൂളി ഫോറസ്റ്റ് സ്റ്റേഷനില്‍ മണ്ണാര്‍ക്കാട്ടെ വെറ്ററിനറി ഡോക്ടര്‍മാരുടെ നിരീക്ഷണത്തിലാണ്. പിടിയാനക്കുട്ടിയുടെ പുറത്തുണ്ടായിരുന്ന ചെറിയ പരുക്കും പൊക്കിള്‍ കൊടിയിലെ അണുബാധയും സുഖപ്പെട്ടിട്ടുണ്ട്. വനപാലകരോടും ഡോക്ടര്‍മാരോടും വളരെയധികം ഇണങ്ങിയ കുട്ടിയാന ആനമൂളിയിലെ വനപാലകരുടെ സംരക്ഷണത്തില്‍ സുഖവാസത്തിലാണ്. നിരവധി ആളുകള്‍ കാട്ടാനകുട്ടിയെ കാണാനെത്തുന്നുണ്ടെങ്കിലും സന്ദര്‍ശകര്‍ക്ക് നിയന്ത്രണമേര്‍പ്പെടുത്തിയിരിക്കുകയാണ്.