പാരിസ്: ഇന്ന് നടന്ന യൂറോ കപ്പിലെ ചെക്ക് റിപ്പബ്ലിക്ക് ക്രൊയേഷ്യ മത്സരം സമനിലയില്‍ കലാശിച്ചു. ഇരു ടീമുകളും രണ്ട് വീതം ഗോളുകള്‍ നേടിയാണ് സമനിലയില്‍ കലാശിച്ചത്. നാലു ഗോളുകള്‍ പിറന്ന രണ്ടാം പകുതിയില്‍ ജയമുറപ്പിച്ച് മുന്നേറുകയായിരുന്ന ക്രൊയേഷ്യയെ അവസാന നിമിഷം ലഭിച്ച പെനാല്‍റ്റി ഗോളില്‍ സമനിലയില്‍ കുരുക്കുകയായിരുന്നു ചെക്ക്. ക്രൊയേഷ്യക്കായി ഇവാന്‍ പെരിസിച്ചും ഇവാന്‍ റാക്കിറ്റിച്ചും സ്‌കോര്‍ ചെയ്തപ്പോള്‍ ചെക്കിനായി സ്‌കോഡയും നെസിഡും ലക്ഷ്യം കണ്ടു. സമനില വഴങ്ങിയതോടെ ഇരുടീമുകള്‍ക്കും അടുത്ത കളി നിര്‍ണായകമാണ്. ആദ്യ പകുതിയില്‍ മികച്ച നീക്കങ്ങള്‍ കൊണ്ട് ക്രൊയേഷ്യ മുന്നിട്ടു നിന്നെങ്കിലും ഗോള്‍ നേടാന്‍ സാധിച്ചില്ല. അവസാന നിമിഷം 2-1ന് ക്രൊയേഷ്യ ജയത്തിലേക്ക് നീങ്ങവെ ക്രോയേഷ്യന്‍ ഫുട്‌ബോള്‍ പ്രേമികള്‍ സ്റ്റേഡിയത്തിലേക്ക് ഫ്‌ളേയറുകള്‍ കത്തിച്ച് വലിച്ചെറിഞ്ഞത് മത്സരത്തെ തടസപ്പെടുത്തി. ഇതിനുശേഷം വീണ്ടും കളി ആരംഭിച്ചപ്പോള്‍ ഡൊമാഗോജ് വിദയുടെ കൈയില്‍ പന്ത് തട്ടിയതിന് റഫറി പെനാല്‍റ്റി അനുവദിച്ചു. കിക്കെടുത്ത തോമസ് നെസിഡ് ചെക്കിന്റെ സമനില ഗോള്‍ നേടുകയായിരുന്നു.