തിരുവനന്തപുരം: സര്‍ക്കാരിന്റെ ക്ഷേമ പദ്ധതികളുടെ പ്രചാരണത്തിനായി സംസ്ഥാനത്താകെ ഹോര്‍ഡിങുകള്‍ സ്ഥാപിക്കുന്നതിന് ടെക്‌നിക്കല്‍ കമ്മിറ്റി രൂപീകരിച്ചു.
സിഡ്‌കോ മുഖാന്തരം സംസ്ഥാനത്താകെ 55 ഹോര്‍ഡിങുകള്‍ 5,23,74,281 രൂപ ചെലവില്‍ വയ്ക്കുന്നതിന് നേരത്തെതന്നെ തീരുമാനമായിരുന്നു.
സര്‍ക്കാര്‍ നടപ്പാക്കുന്ന വിവിധ ക്ഷേമ പദ്ധതികള്‍ ജനങ്ങളിലേക്ക് എത്തുന്നില്ലെന്ന വിലയിരുത്തലിന്റെ അടിസ്ഥാനത്തിലായിരുന്നു ഇത്.
കടുത്ത സാമ്പത്തിക പ്രതിസന്ധിയിലൂടെ കടന്നുപോകുമ്പോഴും ഇത്തരത്തില്‍ ധൂര്‍ത്ത് നടത്തുന്നതിനെതിരേ നേരത്തെതന്നെ പ്രതിഷേധം ഉയര്‍ന്നിരുന്നതാണ്. എന്നാല്‍ അതൊന്നും വകവയ്ക്കാതെയാണ് ഹോര്‍ഡിങുകള്‍ സ്ഥാപിക്കുന്നതിനുള്ള നടപടികളുമായി മുന്നോട്ടുപോകുന്നത്.
മലബാര്‍ മേഖലയില്‍ തൃശൂര്‍, മലപ്പുറം, കോഴിക്കോട്, കണ്ണൂര്‍ ജില്ലകളില്‍ സര്‍ക്കാര്‍ ഉടമസ്ഥതയിലുള്ള സ്ഥലങ്ങളിലും കെട്ടിടങ്ങളിലുമാണ് ഹോര്‍ഡിങുകള്‍ സ്ഥാപിക്കുക.
പദ്ധതിക്ക് സാങ്കേതികാനുമതി നല്‍കുന്നതിനാണ് ടെക്‌നിക്കല്‍ സാങ്ഷന്‍ കമ്മിറ്റി രൂപീകരിച്ചിരിക്കുന്നത്.
പി.ആര്‍.ഡി സെക്രട്ടറി ചെയര്‍മാനായും ഡയറക്ടര്‍ കണ്‍വീനറായുമുള്ള കമ്മറ്റിയില്‍ കെ.എസ്.ഇ.ബി, പി.ഡബ്ല്യു.ഡി, തദ്ദേശ സ്വയംഭരണ വകുപ്പ്, സിഡ്‌കോ എന്നിവിടങ്ങളില്‍നിന്നുള്ള മുതിര്‍ന്ന എന്‍ജിനീയര്‍മാരെയും ഉള്‍പ്പെടുത്തിയിട്ടുണ്ട്.