ജയ്പൂര്‍: പശുക്കടത്ത് ആരോപിച്ച് പെഹ്‌ലുഖാനെ ഒരു കൂട്ടം തീവ്രവാദികള്‍ തല്ലിക്കൊന്ന കേസില്‍ പ്രായപൂര്‍ത്തിയാകാത്ത രണ്ടുപേര്‍ കുറ്റക്കാരെന്ന് തെളിഞ്ഞു. ജുവനൈല്‍ ജസ്റ്റിസ് ബോര്‍ഡാണ് പ്രായപൂര്‍ത്തിയാവാത്ത രണ്ടുപേര്‍ കുറ്റക്കാരാണെന്ന് വിധിച്ചത്. ഇവരുടെ ശിക്ഷ അടുത്ത ശനിയാഴ്ച പ്രഖ്യാപിച്ചേക്കും. ജുവനൈല്‍ ജസ്റ്റിസ് ആക്ട് പ്രകാരം പരമാവധി മൂന്നു വര്‍ഷം വരെ ശിക്ഷ ലഭിക്കുമെന്ന് പെഹ്‌ലുഖാന്‍ കുടുംബ അഭിഭാഷകന്‍ കാസിം ഖാന്‍ പറഞ്ഞു.
2017 ഏപ്രിലില്‍ ആല്‍വറില്‍ വച്ച് പശുക്കടത്ത് ആരോപിച്ച് സംഘ് പരിവാര്‍ അനുകൂല സംഘടനയാണ് പെഹ്‌ലുഖാനെയും രണ്ട് ആണ്‍മക്കളെയും ആക്രമിച്ചത്. സ്വയം രൂപകല്‍പന ചെയ്ത പശു ജാഗ്രത സമിതിയുടെ ആളുകള്‍ എന്ന് പറയുന്ന ഇവര്‍ തീവ്രവാദ സംഘടനകളായ ബജ്‌റംഗ്ദളിന്റയും വിശ്വഹിന്ദു പരിഷത്തിന്റെയും പ്രവര്‍ത്തകരാണ്.
രാത്രി 7 മുതല്‍ 10 വരെ നടത്തിയ ആള്‍ക്കൂട്ട ആക്രമണത്തില്‍ പെഹ്‌ലുഖാന്‍ കൊല്ലപ്പെടുകയും രണ്ട് ആണ്‍മക്കള്‍ക്ക് ഗുരുതരമായി പരുക്കേല്‍ക്കുകയും ചെയ്തിരുന്നു. ക്ഷീര കര്‍ഷകനായ പെഹ്‌ലുഖാന്‍ രാജസ്ഥാനില്‍ നിന്ന് വാങ്ങിയ പശുക്കളുമായി ഹരിയാനയിലെ തന്റെ വീട്ടിലേക്ക് പോകുന്ന വഴിയെയാണ് ആള്‍ക്കൂട്ട ആക്രമണമുണ്ടായത്.
പെഹ്‌ലുഖാന്‍ ആക്രമണത്തില്‍ നേരത്തെ ഒന്‍പത് പേരെ അറസ്റ്റ് ചെയ്തിരുന്നു. എന്നാല്‍ ഇതില്‍ ക്രൈം ഇന്‍വസ്റ്റിഗേഷന്‍ ഏജന്‍സി ആറ് പേരെ കുറ്റവിമുക്തരാക്കുയായിരുന്നു.
ആദ്യമായാണ് പെഹ്‌ലുഖാന്‍ കേസില്‍ ശിക്ഷ വിധിക്കാനൊരുങ്ങുന്നത്. നേരത്തെ പ്രതികളായിരുന്ന വിപിന്‍ യാദവ്, രവീന്ദ്ര കുമാര്‍, ദയാനന്ദ്, യോഗേഷ്, ഭീം സിങ്, ദീപക് എന്നിവരെ തെളിവുകളുടെ അഭാവത്തില്‍ വെറുതെ വിടുകയായിരുന്നു.