വൈപ്പിന്‍:സ്ത്രീ പദവി സ്വയം പഠന പ്രക്രിയയുടെ ഭാഗമായി കുടുംബശ്രീ ജില്ലാമിഷന്റെ സ്ത്രീ സൗഹൃദ പഞ്ചായത്ത് പദ്ധതി ഞാറക്കല്‍ പഞ്ചായത്തില്‍ തുടക്കം കുറിച്ചു പഞ്ചായത്തിലെ മുഴുവന്‍ ഇടങ്ങളും സ്ത്രീകള്‍ക്ക് സൗഹാര്‍ദ അന്തരീക്ഷം സൃഷ്ടിക്കുന്നതിനും സര്‍ക്കാരിന്റെ വിവിധ സംവിധാനങ്ങളും പദ്ധതികളും ലിംഗഭേദമില്ലാതെ എല്ലാവരിലും എത്തിക്കുക എന്നതാണ് പദ്ധതി ലക്ഷ്യമിടുന്നത്.
വാര്‍ഡ് തലത്തില്‍ റിസോഴ്‌സ് പേഴ്‌സണ്‍മാരെ കണ്ടെത്തുകയും അവരിലൂടെ അയല്‍ക്കൂട്ട പരിധിയില്‍ വിവരശേഖരണം നടത്തി നിലവില്‍ സ്ത്രീകള്‍ നേരിടുന്ന പ്രശ്‌നങ്ങള്‍ കണ്ടെത്തി വിവിധ സംവിധാനങ്ങളുടെ സംയോജനത്തിലൂടെ പ്രശ്‌നപരിഹാരം കണ്ടെത്തുക വഴി സ്ത്രീകളുടെ പദവി ഉയര്‍ത്താനും പദ്ധതി ലക്ഷ്യമിടുന്നു.
പദ്ധതിയുടെ ഔദ്യോഗിക പ്രഖ്യാപനം പഞ്ചായത്ത് പ്രസിഡന്റ് ഷില്‍ഡ റിബേരൊ നിര്‍വഹിച്ചു. എ.പി ലാലു അധ്യക്ഷനായി. സാജു മേനാച്ചേരി, മണി സുരേന്ദ്രന്‍, കെ.ആര്‍ രാകേഷ്, മിനിമോള്‍ തുടങ്ങിയവര്‍ സംസാരിച്ചു.