മലപ്പുറം: വരള്‍ച്ച രൂക്ഷമായതോടെ ജില്ലയിലെ കാര്‍ഷികമേഖല വരള്‍ച്ചയുടെ പിടിയില്‍. നെല്ലും പച്ചക്കറിയും നാണ്യവിളകളും ഉള്‍പ്പെടെയുള്ള എല്ലാ കൃഷികളും ഉണങ്ങിനശിക്കുകയാണ്. ജില്ലയുടെ വിവിധ ഭാഗങ്ങളിലായി ഹെക്ടര്‍കണക്കിന് കൃഷികള്‍ നശിച്ചതായാണ് കൃഷിവകുപ്പിന്റെ റിപ്പോര്‍ട്ട്.
കൂടുതല്‍ നാശം നെല്‍കൃഷിക്കാണ്. ആകെ 300 ഹെക്ടടറിലധികം നെല്‍കൃഷിയാണ് വരള്‍ച്ചമൂലം നശിച്ചിരിക്കുന്നത്. ഇതു ജില്ലയില്‍ ആകെയുള്ള നെല്‍കൃഷിയുടെ അറുപത് ശതമാനത്തോളം വരും. ഈ നില തുടര്‍ന്നാല്‍ വരും ദിവസങ്ങളില്‍ കൃഷിനാശം കൂടുമെന്നാണ് അധികൃതര്‍ പറയുന്നത്. സംസ്ഥാനത്ത് പാലക്കാട്, വയനാട്, മലപ്പുറം, കാസര്‍കോട് ജില്ലകളിലാണ് നെല്‍കൃഷി കൂടുതല്‍ നശിച്ചിരിക്കുന്നത്. നെല്ല് കഴിഞ്ഞാല്‍ കൂടുതല്‍ നാശമുണ്ടായിരിക്കുന്നത് പച്ചക്കറി കൃഷിക്കാണ്. കമുക്, വാഴ തുടങ്ങിയവയും വ്യാപകമായി നശിച്ചിട്ടുണ്ട്. വെള്ളമില്ലാതെ ഉണങ്ങിനശിക്കുന്നതിനൊപ്പം വിളവും ഗണ്യമായി കുറയുന്നുണ്ട്. വരും ദിവസങ്ങളില്‍ വരള്‍ച്ച രൂക്ഷമാകുന്നതോടെ കൂടുതല്‍ കൃഷിനാശം സംഭവിക്കാനാണ് സാധ്യത. കൂഷിനാശം സംഭവിച്ച കര്‍ഷകര്‍ക്കുള്ള പ്രകൃതിക്ഷോഭ ദുരിതാശ്വാസത്തിനുള്ള സഹായധനമായി ജില്ലയ്ക്ക് ഇതുവരെ ഒന്നരക്കോടി രൂപയാണ് അനുവദിച്ചിട്ടുള്ളത്. ഇതില്‍ 75 ലക്ഷം രൂപ ഇതിനകം വിതരണം ചെയ്തിട്ടുണ്ട്.