ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ മാഞ്ചസ്റ്റര്‍ സിറ്റിയുടെ കിരീട പ്രതീക്ഷകള്‍ക്ക് മങ്ങലേറ്റു. ഇന്നലെ നടന്ന മത്സരത്തില്‍ ന്യൂ കാസില്‍ യുനൈറ്റഡിനോട് 2-1 എന്ന സ്‌കോറിനാണ് സിറ്റി പരാജയപ്പെട്ടത്. മറ്റൊരു മത്സരത്തില്‍ മാഞ്ചസ്റ്റര്‍ യുനൈറ്റഡ് സമനിലയുമായി രക്ഷപ്പെട്ടു. 86-ാം മിനുട്ട് വരെ രണ്ട് ഗോളിന് പിന്നില്‍ നിന്നിരുന്ന യുനൈറ്റഡ് 87, 91 മിനുട്ടുകളിള്‍ ഗോള്‍ തിരിച്ചടിച്ചാണ് സമനില പാലിച്ചത്.
എവേ മല്‍സരത്തില്‍ ന്യൂകാസില്‍ യുനൈറ്റഡാണ് ഒന്നിനെതിരേ രണ്ടണ്ടു ഗോളുകള്‍ക്ക് സിറ്റിയെ ഞെട്ടിച്ചത്. ബേണ്‍ലിയുമായി നടന്ന ഹോം മാച്ചില്‍ യുനൈറ്റഡ് 2-2ന്റെ സമനില വഴങ്ങുകയായിരുന്നു. മറ്റു മത്സരങ്ങളില്‍ ആഴ്‌സനല്‍ 2-1ന് കാര്‍ഡിഫ് സിറ്റിയെയും ഫുള്‍ഹാം 4-2ന് ബ്രൈറ്റണിനെയും എവേര്‍ട്ടന്‍ 1-0ന് ഹഡേഴ്‌സ്ഫീല്‍ഡിനെയും വോള്‍ഫ്‌സ് 3-0ന് വെസ്റ്റ്ഹാമിനെയും പരാജയപ്പെടുത്തി.
എവേ മത്സരത്തില്‍ ന്യൂകാസിലിനെതിരേ ഒരു ഗോളിന് ലീഡ് ചെയ്ത ശേഷമാണ് സിറ്റി അപ്രതീക്ഷിത തോല്‍വി നേരിട്ടത്. സൂപ്പര്‍ താരം സെര്‍ജിയോ അഗ്യൂറോ ആദ്യ മിനുട്ടില്‍ തന്നെ സിറ്റിക്ക് ലീഡ് നേടിക്കൊടുത്തിരുന്നു. എന്നാല്‍ സൊളാമോന്‍ റൊന്‍ഡന്‍ (66), മാറ്റ്‌റിച്ചി (80) എന്നിവരുടെ ഗോളുകളില്‍ ന്യൂകാസില്‍ ജയം സ്വന്തമാക്കുകയായിരുന്നു. സിറ്റിയുടെ തോല്‍വിയോടെ ലീഗില്‍ തലപ്പത്തു നില്‍ക്കുന്ന ലിവര്‍പൂളിന്റെ കിരീടസാധ്യത വര്‍ധിക്കുകയും ചെയ്തു. അതേസമയം, തുടര്‍ച്ചയായ എട്ടു ജയങ്ങളുമായി മുന്നേറിയ യുനൈറ്റഡ് അപ്രതീക്ഷിത സമനിലയാണ് ബേണ്‍ലിക്കെതിരേ നേരിട്ടത്.
ഒരു ഘട്ടത്തില്‍ 0-2ന്റെ തോല്‍വി മുന്നില്‍ കണ്ടണ്ട യുനൈറ്റഡ് 87, 90+4 മിനിട്ടുകളില്‍ ഗോളുകള്‍ തിരിച്ചടിച്ച് സമനില കൈക്കലാക്കുകയായിരുന്നു. പോള്‍ പോഗ്ബ, വിക്ടര്‍ ലിന്‍ഡെലോഫ് എന്നിവരാണ് യുനൈറ്റഡിന്റെ സ്‌കോറര്‍മാര്‍. കളിയിലുടനീളം യുനൈറ്റഡ് ആധിപത്യം പുലര്‍ത്തിയെങ്കിലും ലഭിച്ച അവസരങ്ങളില്‍ പലതും ഗോളാക്കി മാറ്റാനായില്ല.