നിലമ്പൂര്‍: കരിമ്പുഴക്കു കുറുകെ ഏനാന്തി പാലം നിര്‍മാണത്തിനു മുന്നോടിയായി റവന്യു വകുപ്പ് പ്രാഥമിക സര്‍വേ നടത്തി. പാലത്തോടനുബന്ധിച്ച് അപ്രോച്ച് റോഡ് നിര്‍മാണത്തിനായി ഏറ്റെടുക്കേണ്ട സ്ഥലവുംമറ്റും തിട്ടപ്പെടുത്തുന്നതിന്റെ ഭാഗമായാണ് നിലമ്പൂര്‍ വില്ലേജ് ഓഫിസര്‍ അനില്‍കുമാറിന്റെ നേതൃത്വത്തില്‍ സ്ഥലം സന്ദര്‍ശിച്ചത്.
നിലവില്‍ ആറു മുതല്‍ എട്ടു മീറ്റര്‍ വരെയാണ് റോഡിന്റെ ഈ ഭാഗത്തെ വീതി. അപ്രോച്ച് നിര്‍മാണത്തിന് കൂടുതല്‍ സ്ഥലം ആവശ്യമായി വരികയാണെങ്കില്‍ വിട്ടുകൊടുക്കാന്‍ പ്രദേശവാസികള്‍ സന്നദ്ധത അറിയിച്ചിട്ടുണ്ട്. പാലം നിലവില്‍ വന്നാല്‍ ഏനാന്തി, പുല്ലഞ്ചേരി, ചക്കപ്പാലി, കൊങ്ങമ്പാടം, മാങ്കുത്ത്, പാത്തിപ്പാറ, പനമണ്ണ, പള്ളിക്കുത്ത് തുടങ്ങി നിലമ്പൂര്‍ നഗരസഭ, ചുങ്കത്തറ, കരുളായി പഞ്ചായത്തുകളിലെ വിവിധ പ്രദേശങ്ങളിലെ ആളുകളുടെ യാത്രാ ദുരിതത്തിന് ആശ്വാസമാവും.
റോഡ് നിര്‍മാണത്തിന് അധികം സ്ഥലം ഏറ്റെടുക്കേണ്ടതായി വരില്ലെന്നാണ് വില്ലേജ് അധികൃതരുടെ പ്രാഥമിക നിഗമനം. പുഴയുമായി ചേരുന്നിടത്ത് റോഡിന് 15 മീറ്ററോളം സ്ഥലമുണ്ട്. വില്ലേജ് ഓഫിസര്‍ക്ക് പുറമെ ഫീല്‍ഡ് അസിസ്റ്റന്റ് വി പ്രഭാകരന്‍, വി റജീഷ് എന്നിവരാണ് സംഘത്തിലുണ്ടായിരുന്നത്. ഏനാന്തിപാലത്തിന് ബജറ്റില്‍ എട്ടു കോടിയുടെ നിര്‍മാണ പ്രവൃത്തിക്ക് ടോക്കണ്‍ പ്രൊവിഷന്‍ ലഭിച്ചിട്ടുണ്ട്.