ന്യൂഡല്‍ഹി: വധശിക്ഷ ജീവപര്യന്തമാക്കി കുറയ്ക്കണമെന്നാവശ്യപ്പെട്ട് നിര്‍ഭയ കേസിലെ പ്രതി വിനയ് ശര്‍മ ഡല്‍ഹി ലഫ്. ഗവര്‍ണര്‍ അനില്‍ ബെയ്ജാലിന് ഹര്‍ജി സമര്‍പ്പിച്ചു. അഭിഭാഷകന്‍ എ.പി സിങ് വഴിയാണ് വിനയ് ഹര്‍ജി നല്‍കിയത്. അപൂര്‍വങ്ങളില്‍ അപൂര്‍വമായ കേസുകള്‍ക്ക് വിധിക്കുന്ന പരമാവധി ശിക്ഷയായ വധശിക്ഷക്ക് താന്‍ അര്‍ഹനല്ലെന്നും ജീവപര്യന്തം ശിക്ഷ നല്‍കണമെന്നുമാണ് വിനയ് ശര്‍മയുടെ വാദം.

കേസിലെ നാലുപ്രതികളെയും 20നു രാവിലെ 5.30ന് തിഹാര്‍ ജയിലില്‍ തൂക്കിലേറ്റാന്‍ ഡല്‍ഹി അഡീഷണല്‍ സെഷന്‍സ് കോടതി മരണവാറന്റ് പുറപ്പെടുവിച്ചിരിക്കുകയാണ്. പ്രതികളുടെ ഹരജികളെ തുടര്‍ന്ന് മുന്‍പ് മൂന്നുതവണ വധശിക്ഷ മാറ്റിവച്ചിരുന്നു.