താമരശ്ശേരി: പൂനൂരില്‍ വീണ്ടും വിദേശമദ്യ വേട്ട. 55 കുപ്പി വിദേശ മദ്യവുമായി പൂനൂര്‍ കൈതേരിപ്പൊയില്‍ സജീവന്‍ (49) നെ താമരശ്ശേരി എക്‌സൈസ് ഇന്‍സ്‌പെക്ടര്‍ പി.പി വേണുവും സംഘവും പിടികൂടി. മാഹിയില്‍നിന്ന് മദ്യം കടത്തി സ്ഥിരമായി വില്‍പന നടത്തുന്ന ഇയാള്‍ക്കെതിരേ പ്രദേശവാസികള്‍ എക്‌സൈസ് കമ്മിഷണറടക്കം ഉന്നതാധികാരികള്‍ക്ക് പരാതി നല്‍കിയിരുന്നു. ഇയാളുടെ പൂനൂര്‍ 19ലെ വീട്ടില്‍ നിന്നാണ് 55 കുപ്പി മാഹിമദ്യം പിടികൂടിയത്.
സജീവനെതിരേ ബാലുശ്ശേരിയില്‍ രണ്ടു കേസുകള്‍ നിലവിലുണ്ട്. ഇയാളെ ഷാഡോ ടീം നിരീക്ഷിച്ചുവരുന്നതിനിടെയാണ് ഇന്നലെ അറസ്റ്റിലായത്. പ്രിവന്റിവ് ഓഫിസര്‍ ചന്ദ്രന്‍ കുഴിച്ചാലില്‍, സി.പി.ഒമാരായ പി. ശ്രീരാജ്, സി.ജി ഷാജു, എന്‍.പി വിവേക്, വി.ആര്‍ അശ്വന്ത്, ടി.എം ഷിംന, ഡ്രൈവര്‍ കൃഷ്ണന്‍ എന്നിവരടങ്ങിയ സംഘമാണ് സജീവനെ അറസ്റ്റ് ചെയ്തത്. പേരാമ്പ്ര കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു. ചൊവ്വാഴ്ച പൂനൂര്‍ പാലത്തിനു സമീപം നടത്തിയ പരിശോധനയില്‍ 51 കുപ്പി മദ്യവുമായി ജിങ്കോ ശരത്ത് എന്നയാളെ പിടികൂടിയിരുന്നു.