ആലപ്പുഴ: അമിതമായി മദ്യപിച്ചയാള്‍ ഓടിച്ച കാര്‍ വിദ്യാര്‍ഥിനികളടക്കം ആറുപേരെ ഇടിച്ചു തെറിപ്പിച്ചു. പരീക്ഷ കഴിഞ്ഞു വീട്ടിലേക്കു മടങ്ങുകയായിരുന്ന ഹയര്‍ സെക്കന്‍ഡറി സ്‌കൂള്‍ വിദ്യാര്‍ഥിനികളെ കനാലിലേക്കാണ് ഇടിച്ചുതെറിപ്പിച്ചത്. ആലപ്പുഴ പൂച്ചാക്കലില്‍ ഉച്ചയ്ക്ക് ഒന്നേമുക്കാലോടെയാണ് അപകടം.

റോഡരികില്‍ ബൈക്കിലിരുന്ന അനീഷ് എന്നയാളെയും മകന്‍ വേദവിനെയുമാണ് കാര്‍ ആദ്യം ഇടിച്ചത്. അതിനു ശേഷം ചന്ദന, അര്‍ച്ചന, സാഗി എന്നീ പ്ലസ് ടു വിദ്യാര്‍ഥിനികളെ ഇടിച്ചു തെറിപ്പിക്കുകയായിരുന്നു. ഇവരെ കാര്‍ ഇടിച്ച് കനാലിലേക്ക് തെറുപ്പിക്കുകയായിരുന്നു. അതിനുശേഷം സൈക്കിളില്‍ പോയ അനഘ എന്ന വിദ്യാര്‍ഥിനിയെയും കാര്‍ ഇടിച്ചു തെറുപ്പിച്ചു. തുടര്‍ന്ന് പോസ്റ്റില്‍ ഇടിച്ചാണ് കാര്‍ നിന്നത്.

ഒരു കുട്ടിയുടെ നില ഗുരുതരമാണ്.

പൂച്ചാക്കല്‍ സ്വദേശി മനോജ്, ഇതരസംസ്ഥാന തൊഴിലാളിയായ ആനന്ദ് മുഡോയി എന്നിവരാണ് കാറിലുണ്ടായിരുന്നത്. ഇരുവര്‍ക്കും അപകടത്തില്‍ ഗുരുതരമായി പരുക്കേറ്റിട്ടുണ്ട്. ഇരുവരെയും കോട്ടയം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു.

 കാര്‍ അമിത വേഗത്തിലായിരുന്നെന്ന് സിസിടിവി ദൃശ്യങ്ങളില്‍ വ്യക്തമാണ്. കാറോടിച്ചയാള്‍ മദ്യപിച്ചിരുന്നതായി ദൃക്‌സാക്ഷികള്‍ പറയുന്നു. നാട്ടുകാരാണ് ഇവരെയും പരുക്കേറ്റവരേയും ആശുപത്രിയിലെത്തിയത്.