ചാവക്കാട്: കാമുകിയുടെ ഒന്‍പത് വയസുകാരിയായ മകളെ പീഡിപ്പിച്ച കേസിലെ പ്രതിയെ കസ്റ്റഡിയില്‍ വാങ്ങി തെളിവെടുപ്പ് നടത്തി. എടക്കഴിയൂര്‍ നാലാം കല്ല് സെന്ററില്‍ പച്ചക്കറി വ്യാപാരിയായ അകലാട് കാട്ടിലെപള്ളി സ്വദേശി കല്ലുവളപ്പില്‍ അലിയേയാണ് (50) ചാവക്കാട് എസ്.ഐ ജി. ജയകുമാര്‍ ,കെ.വി മാധവന്‍ എന്നിവരുടെ നേതൃത്വത്തില്‍ തെളിവെടുപ്പ് നടത്തിയത്.
ബാലികയെ കാമുകിയായ മാതാവിന്റെ ഒത്താശയോടെ പീഡനത്തിന് വിധേയമാക്കിയത് കൂടാതെ ഭീഷണിപെടുത്തി ആഭരണങ്ങള്‍ അഴിച്ചു വാങ്ങിയെന്നുമാണ് ഇയാള്‍ക്കെിരെയുള്ള പരാതി. ഇതിന്റെ അടിസ്ഥാനത്തിലാണ് റിമാന്‍ഡില്‍ കഴിയുന്ന അലിയെ തെളിവെടുപ്പിന് കസ്റ്റഡിയില്‍ വാങ്ങിയത്. ചാവക്കാട്, പുന്നയൂര്‍ മേഖലയിലെ രണ്ട് ധനകാര്യ സ്ഥാപനങ്ങളില്‍ തെളിവെടുപ്പ് നടത്തിയപ്പോള്‍ ഇയാള്‍ പണയം വെച്ച മൂന്ന് പവന്‍ സ്വര്‍ണാഭരണങ്ങള്‍ കണ്ടെടുക്കാനായി. ഇത് കൂടാതെ ബാലികയെ പീഡിപ്പിക്കാന്‍ കഴുത്തില്‍ വച്ച് ഭീഷണിപെടുത്തിയ കത്തി പീഡനം നടന്ന വീടിന്റെ കോഴിക്കൂട്ടില്‍ നിന്നും പൊലിസ് കണ്ടെടുത്തു.
കാമുകിയുമായി ഒന്‍പത് വര്‍ഷമായുള്ള രഹസ്യ ബന്ധത്തെക്കൂടാതെയാണ് അവരുടെ മകളെയും പീഡിപ്പിക്കാന്‍ തുടങ്ങിയത്. കത്തി കഴുത്തില്‍ വെച്ചു കൊന്നുകളയുമെന്ന് ഭീക്ഷണിപെടുത്തിയാണ് കുട്ടിയെ പീഡിപ്പിച്ചിരുന്നത്. രണ്ടാഴ്ച മുന്‍പ് അലിയെ യുവതിയുടെ ഭര്‍തൃമാതാവും ബന്ധുക്കളും ചേര്‍ന്നാണ് രാത്രി യുവതിയുടെ മുറിയില്‍ നിന്നും പിടിക്കൂടി പൊലിസില്‍ ഏല്‍പ്പിച്ചത്.
സി.ഐ ജി ഗോപകുമാറിന്റെ നേതൃത്വത്തിലാണ് അലിയെയും യുവതിയെയും, അറസ്റ്റു ചെയ്തത്. യുവതി വിയൂര്‍വനിതാ ജയിലില്‍ കഴിയുകയാണ്. കസ്റ്റഡിയില്‍ വാങ്ങിയ പ്രതിയെ നാളെ കോടതിയില്‍ ഹാജരാക്കും.