കൊല്ലം: രാഷ്ട്രപിതാവിന്റെ ദീപ്തസ്മരണകള്‍ക്ക് ആദരാഞ്ജലി അര്‍പ്പിച്ച് രക്തസാക്ഷിദിനം ജില്ലയില്‍ സമുചിതമായി ആചരിച്ചു. രാവിലെ 7.30ന് ചിന്നക്കട പൊതുമരാമത്ത് റസ്റ്റ് ഹൗസിന് മുന്നില്‍ തുടങ്ങിയ ശാന്തിയാത്ര ജില്ലാ കലക്ടര്‍ ഡോ. എസ്. കാര്‍ത്തികേയന്‍ ഫഌഗ് ഓഫ് ചെയ്താണ് ഔദ്യോഗിക പരിപാടികള്‍ക്ക് തുടക്കമിട്ടത്. ഗാന്ധിയന്‍മാര്‍, കലാസാംസ്‌കാരികരാഷ്ട്രീയ രംഗങ്ങളിലെ പ്രമുഖര്‍, വ്യാപാരിവ്യവസായി സംഘടനാ പ്രതിനിധികള്‍, സര്‍ക്കാര്‍ ജീവനക്കാര്‍, അധ്യാപകര്‍, വിദ്യാര്‍ഥികള്‍, സ്റ്റുഡന്റ് പൊലിസ്, എന്‍.സി.സി, സ്‌കൗട്ട്‌സ്, ഗൈഡ്‌സ്, എന്‍.എസ്.എസ് വള@ിയര്‍മാര്‍ തുടങ്ങിയവരാണ് കൊല്ലം ബീച്ചിലെ ഗാന്ധിപാര്‍ക്കില്‍ സമാപിച്ച ശാന്തിയാത്രയില്‍ പങ്കെടുത്തത്.ഗാന്ധി പ്രതിമയില്‍ ജില്ലാ കലക്ടര്‍ ഹാരാര്‍പണം നടത്തി. എ.ഡി.എം ബി. രാധാകൃഷ്ണന്‍, ഗാന്ധിയന്‍ സംഘടനാ പ്രതിനിധികളായ പോള്‍ മത്തായി, ജി.ആര്‍. കൃഷ്ണകുമാര്‍, ജില്ലാ ഇന്‍ഫര്‍മേഷന്‍ ഓഫിസര്‍ സി. അജോയ്, തഹസില്‍ദാര്‍ ടി.ആര്‍ അഹമ്മദ് കബീര്‍ എന്നിവരും പങ്കുചേര്‍ന്നു.
ഗാന്ധിസ്മൃതി സംഗമം ജില്ലാ കലക്ടര്‍ ഡോ. എസ്. കാര്‍ത്തികേയന്‍ ഉദ്ഘാടനം ചെയ്തു. പരിസ്ഥിതി സൗഹൃദ ജീവിതരീതിയെക്കുറിച്ചുള്ള ഗാന്ധിയന്‍ ദര്‍ശനങ്ങള്‍ക്ക് ഇന്ന് പ്രാധാന്യം ഏറിയിട്ടുണ്ടെന്ന് അദ്ദേഹം പറഞ്ഞു. പ്ലാസ്റ്റിക്കില്‍ നിന്ന് മുക്തിനേടാനുള്ള പ്രവര്‍ത്തനങ്ങള്‍ക്ക് ഗാന്ധിജിയുടെ വാക്കുകള്‍ പ്രചോദനമാകണം. ഇക്കാര്യത്തില്‍ വ്യക്തികളാണ് സ്വയം മാറേണ്ടത്. അതുവഴി സമൂഹത്തിലും രാജ്യത്താകെയും മാറ്റം കൊണ്ടു വരാന്‍ കഴിയുമെന്നും കലക്ടര്‍ കൂട്ടിച്ചേര്‍ത്തു.
എ.ഡി.എം ബി. രാധാകൃഷ്ണന്‍ അധ്യക്ഷനായി. ഗാന്ധി പീസ് ഫൗണ്ടേഷന്‍ വര്‍ക്കിംഗ് ചെയര്‍മാന്‍ പോള്‍ മത്തായി ദേശീയോദ്ഗ്രഥന പ്രതിജ്ഞ ചൊല്ലിക്കൊടുത്തു. ജി. പ്രതാവവര്‍മ തമ്പാന്‍ ഗാന്ധി അനുസ്മരണ പ്രഭാഷണം നടത്തി.
ഗാന്ധിയന്‍ സംഘടനകളെ പ്രതിനിധീകരിച്ച് എസ്. പ്രദീപ് കുമാര്‍ സംസാരിച്ചു. ഉമയനല്ലൂര്‍ ഗോവിന്ദരാജ് സര്‍വമത പ്രാര്‍ഥന നടത്തി. ജില്ലാ ഇന്‍ഫര്‍മേഷന്‍ ഓഫിസര്‍ സി. അജോയ്, തഹസില്‍ദാര്‍ ടി.ആര്‍. അഹമ്മദ് കബീര്‍ തുടങ്ങിയവര്‍ സംസാരിച്ചു. വിവിധ ഗാന്ധിയന്‍ സംഘടനാ പ്രതിനിധികളായ ജി.ആര്‍ കൃഷ്ണകുമാര്‍, കുരീപ്പുഴ ഷാനവാസ്, ബിജു, ഓമനക്കുട്ടി, അയത്തില്‍ സുദര്‍ശന്‍ തുടങ്ങിയവര്‍ സംസാരിച്ചു.
പരിപാടിയില്‍ പങ്കെടുത്തവര്‍ക്ക് ഹോട്ടല്‍ ആന്‍ഡ് റസ്റ്ററന്റ് അസോസിയേഷന്‍ പ്രഭാതഭക്ഷണം നല്‍കി. ഹരിതചട്ടം പാലിച്ചായിരുന്നു ചടങ്ങുകള്‍ സംഘടിപ്പിച്ചത്.