വത്തിക്കാന്‍: ചരിത്രപരമായ സന്ദര്‍ശനത്തിനായി ഫ്രാന്‍സിസ് മാര്‍പാപ്പ നാളെ യു.എ.ഇയിലെത്തും. ഇതാദ്യമായാണ് മാര്‍പാപ്പ അറബ് ലോകത്ത് എത്തുന്നത്. നാളെ അബൂദബിയിലെത്തുന്ന അദ്ദേഹം മൂന്നു ദിവസം യു.എ.ഇയില്‍ തങ്ങി വിവിധ കേന്ദ്രങ്ങളില്‍ സന്ദര്‍ശനം നടത്തും. നാളെ മുതല്‍ അഞ്ചുവരെ നടക്കുന്ന 'മാനവസാഹോദര്യം' രാജ്യാന്തര മതാന്തര സമ്മേളനത്തില്‍ പങ്കെടുക്കാനായാണ് മാര്‍പാപ്പ എത്തുന്നത്. അബൂദാബി കിരീടാവകാശി മുഹമ്മദ് ബിന്‍ സായിദ് ആല്‍ നഹ്‌യാന്റെ പ്രത്യേക ക്ഷണപ്രകാരമാണ് സന്ദര്‍ശനം. സമ്മേളനത്തിന്റെ ഭാഗമായി യു.എ.ഇ ഭരണാധികാരികള്‍ക്കു പുറമെ ഈജിപ്തിലെ അല്‍ അസ്ഹര്‍ സര്‍വകലാശാല ഗ്രാന്‍ഡ് ഇമാം ശൈഖ് അഹ്മദ് അല്‍ ത്വയ്യിബുമായും അദ്ദേഹം കൂടിക്കാഴ്ച നടത്തും.
സമാപന ദിവസം ശൈഖ് സായിദ് സ്‌പോര്‍ട്‌സ് സിറ്റി സ്റ്റേഡിയത്തില്‍ നടക്കുന്ന പൊതുപരിപാടിയില്‍ ഒന്നരലക്ഷത്തോളം പേര്‍ പങ്കെടുക്കുമെന്നാണു കണക്കാക്കുന്നത്. യു.എ.ഇ സന്ദര്‍ശനത്തിലൂടെ മതങ്ങളുടെ ചരിത്രത്തില്‍ പുതിയൊരു താള്‍ എഴുതിച്ചേര്‍ക്കാന്‍ കാത്തിരിക്കുകയാണെന്ന് മാര്‍പാപ്പ വിഡിയോ സന്ദേശത്തില്‍ പറഞ്ഞു.