ന്യൂഡല്‍ഹി: കൊവിഡ് ബാധിച്ച് മരിച്ചവരുടെ കുടുംബത്തിന് നാലുലക്ഷം ധനസഹായം നല്‍കുമെന്ന ഉത്തരവ് തിരുത്തി കേന്ദ്ര സര്‍ക്കാര്‍. ഇതിനൊപ്പം ചികിത്സാ സഹായവും പിന്‍വലിച്ചിട്ടുണ്ട്. ഇതു സംബന്ധിച്ച് കേന്ദ്ര ആഭ്യന്തര മന്ത്രാലയം ഉത്തരവിറക്കി. ലോക ആരോഗ്യ മന്ത്രാലയം കൊവിഡിനെ ദേശീയ ദുരന്തമായി പ്രഖ്യാപിച്ചതിന് പിന്നാലെയായിരുന്നു കേന്ദ്ര സര്‍ക്കാര്‍ ഉത്തരവ്.

 ഒരു മാസത്തേക്ക് ക്വാറന്റീന്‍, സാംപിള്‍ ശേഖരണം, സ്‌ക്രീനിങ് എന്നിവയ്ക്കുള്ള ചെലവ് (എസ്ഡിആര്‍ഫ് വിഹിതത്തിന്റെ 25% കൂടരുത്, ആവശ്യമെങ്കില്‍ സംവിധാനങ്ങള്‍ നീട്ടാം), പരിശോധനയ്ക്കുള്ള സംവിധാനങ്ങളൊരുക്കുന്നതിനുള്ള ചെലവ് എന്നിവയേ ദുരന്ത നിവാരണ ഫണ്ടില്‍ നിന്ന് എടുക്കാവൂ എന്നാണ് ആഭ്യന്തരമാന്ത്രാലയം ഇറക്കിയ പുതിയ ഉത്തരവില്‍ പറയുന്നത്.

രാജ്യത്ത് 84 പേരിലാണ് കൊവിഡ് കണ്ടെത്തിയത്. ഇതില്‍ 10 പേര്‍ പൂര്‍ണമായും സുഖപ്പെട്ടുവെന്നും ഇവര്‍ ആശുപത്രി വിട്ടുവെന്നും ആരോഗ്യമന്ത്രാലയം സ്പെഷ്യല്‍ സെക്രട്ടറി സഞ്ജീവ കുമാര്‍ വ്യക്തമാക്കി. 4000 ത്തില്‍ അധികം പേരാണ് നിരീക്ഷണത്തില്‍ കഴിയുന്നത്.