ചെറുതുരുത്തി: അന്ധവിശ്വാസങ്ങളുടേയും അനാചാരങ്ങളുടേയും നീരാളി പിടുത്തത്തില്‍ നിന്ന് ദൈവത്തിന്റെ സ്വന്തം നാടിനെ മോചിപ്പിക്കാന്‍ നവോത്ഥാന മേഖലയില്‍ ചടുലമായ മുന്നേറ്റങ്ങള്‍ക്ക് നേതൃത്വം നല്‍കിയ നാടകാചാര്യന്‍ പാഞ്ഞാള്‍ മുട്ടത്ത് കാട്ടില്‍ മാമണ്ണ് മന സുബ്രഹ്മണ്യന്‍ നമ്പൂതിരി (തുപ്പേട്ടന്‍-90) ഇനി ഓര്‍മ്മ.
പെട്ടിയില്‍ സൂക്ഷിച്ച തൂലിക വീണ്ടും പുറത്തെടുത്ത് സ്വന്തം ജീവിത കഥ നാടകമാക്കാനുള്ള സ്വപ്നം ബാക്കിയാക്കിയാണ് തുപ്പേട്ടന്‍ അരങ്ങൊഴിഞ്ഞത്. കേരളത്തിന്റെ സാംസ്‌ക്കാരിക രംഗത്ത് വെള്ളിടികള്‍ സൃഷ്ടിച്ച വയാണ് തുപ്പേട്ടന്റെ നാടകങ്ങള്‍. 1921 മാര്‍ച്ച് ഒന്നിന് വേദ പണ്ഡിതന്‍ മാമണ്ണ് ഇട്ടീരവി നമ്പൂതിരിയുടേയും ദേവകി അന്തര്‍ജനത്തിന്റേയും മകനായി ജനം.
യുവത്വം മുഴുവന്‍ വിപ്ലവമായിരുന്നു തലയില്‍. അതുകൊണ്ടു തന്നെ നിലനിന്നിരുന്ന വ്യവസ്ഥിതിയോട് കലഹിച്ചും പോരാടിയും നാടിന്റെ നവോത്ഥാന മണ്ഡലത്തില്‍ തന്റേതായഒരിടം കണ്ടെത്തി.
പാഞ്ഞാള്‍ ഗവണ്‍മെന്റ് ഹൈസ്‌കൂളില്‍ 27 കൊല്ലം അധ്യാപകനായി പ്രവര്‍ത്തിച്ചു. ചിത്ര കലാധ്യാപകനായി സേവനമനുഷ്ഠിയ്ക്കുമ്പോഴും നാടക രചനയിലും സജീവമായി. സി.എന്‍.എന്‍ ഹൈസ്‌കൂള്‍ ചേര്‍പ്പ്, എസ്.എം.ടി ഹൈസ്‌കൂള്‍ ചേലക്കര, മഹാരാജാസ് കോളജ് സ്‌കൂള്‍ ഓഫ് ആര്‍ട്‌സ്, കൊച്ചി മുണ്ടംവേലി ഹൈസ്‌കൂള്‍ എന്നിവിടങ്ങളിലും അധ്യാപകനായി പ്രവര്‍ത്തിച്ചു.
ചക്ക, തനത് ലാവണം, മറുമരുന്ന്, വേട്ടക്കാര പയ്യല്‍, ഭദ്രായനം, മോഹന സുന്ദരപാലം, ഡബിള്‍ ആക്ട് എന്നിവയാണ് ശ്രദ്ധേയമായ നാടകങ്ങള്‍. വന്നന്ത്യേ കാണാം എന്ന നാടകത്തിന് 2003ല്‍ സംസ്ഥാന സാഹിത്യ അക്കാദമിയുടെ പുരസ്‌കാരം ലഭിച്ചു.